Ys Sharmila : తెలంగాణలో కొత్త కొలువులకు సంబంధించిన ప్రకటన చేసేశారు తెలంగాణ ముఖ్యమంత్రి కల్వకుంట్ల చంద్రశేఖర్ రావు. దాదాపు 90 వేల ఉద్యోగాలకు ప్రకటన వచ్చింది ముఖ్యమంత్రి నోటి వెంట.. అదీ అసెంబ్లీ సాక్షిగా. తెలంగాణలోని నిరుద్యోగ యువత ఎంతోకాలంగా ఎదురుచూస్తున్న ప్రకటన ఇది.
అబ్బే, ఇదేమంత గొప్ప ప్రకటన కాదంటూ విపక్షాలు సెటైర్లు వేస్తున్నాయనుకోండి.. అది వేరే సంగతి. అయినాగానీ, ‘ప్రకటన అయితే వచ్చింది కదా.. వీలైనంత త్వరగా ఉద్యోగాల భర్తీ చేయాలి..’ అంటూ విపక్షాలు డిమాండ్ చేయడం కొంతవరకు సబబే.
కాగా, సందట్లో సడేమియా రంగంలోకి దూకేశారు వైఎస్సార్ తెలంగాణ పార్టీ అధినేత్రి వైఎస్ షర్మిల. తమ పోరాటాల వల్లే కేసీయార్ సర్కారు దిగి వచ్చిందన్నది షర్మిల వాదన. నిరుద్యోగ యువత కోసం ప్రతి మంగళవారం వైఎస్ షర్మిల తెలంగాణలోని ఎంపిక చేసిన ప్రాంతాల్లో ఆందోళనలు, దీక్షలు చేసిన సంగతి తెలిసిందే. ఆ విషయాన్నే ఆమె ప్రస్తావిస్తూ తమ పోరాటాలకు ఫలితం లభించిందని చెప్పుకొచ్చారు.
బీజేపీగానీ, కాంగ్రెస్ పార్టీగానీ, తెలంగాణలో ఏ ఇతర పార్టీగానీ ఉద్యోగాల క్రెడిట్ని తన ఖాతాలో వేసుకోలేకపోగా, వైఎస్ షర్మిల మాత్రం, ధైర్యంగా ముందుకొచ్చేశారు. షర్మిల ఇలా తెరపైకి రావడం పట్ల కొంతమేర ఆశ్చర్యం వ్యక్తం చేస్తున్నాయి ఆయా రాజకీయ పార్టీలు.
వైఎస్ షర్మిల టైమింగ్ అదింది.. ఆ టైమింగ్తోనే ఆంధ్రప్రదేశ్లో కూడా వైఎస్ జగన్ సర్కారుని నిలదీయొచ్చు కదా.? అన్న చర్చ ఏపీలో జరుగుతుండడం గమనార్హం.