Bheemla Nayak : ఆంధ్రప్రదేశ్ ప్రభుత్వం, సినీ పరిశ్రమ విజ్ఞప్తుల పట్ల సానుకూలంగా స్పందించింది. పెద్ద సినిమాలకు తొలి వారం టిక్కెట్ల ధర పెంపుకు ముఖ్యమంత్రి వైఎస్ జగన్ మోహన్ రెడ్డి సానుకూలత వ్యక్తం చేశారు. ఆ లెక్కన, పవన్ కళ్యాణ్ నటించిన ‘భీమ్లానాయక్’ సినిమాకే తొలి అడ్వాంటేజ్ దక్కనుందన్న చర్చ సినీ, రాజకీయ వర్గాల్లో జరుగుతోంది.
అయితే, ఆంధ్రప్రదేశ్ ప్రభుత్వం ఈ విషయమై ఇంకా పూర్తిస్థాయిలో స్పష్టత ఇవ్వాల్సి వుంది. ‘భీమ్లానాయక్’ సినిమా ఎప్పుడొచ్చినా, దాన్ని తొక్కేయాలన్న కసితో వుంది అధికార వైసీపీ. ఏదో ఒక కుంటి సాకు చూపి, ‘భీమ్లానాయక్’ సినిమాని జగన్ సర్కారు అడ్డుకోవడం ఖాయమన్న బలమైన అభిప్రాయంతో వున్నారు జనసైనికులు, పవన్ కళ్యాణ్ అభిమానులు.
‘మనల్ని ఆపేదెవరు.?’ అంటూ ఆ మధ్య పవన్ కళ్యాణ్ ఒకింత ఆవేశపూరితమైన డైలాగ్ పేల్చిన దరిమిలా, ‘ఆపి చూపాల్సిందే..’ అని వైసీపీ శ్రేణులు గట్టిగా సంకల్పించేసుకున్నాయి. అంతేనా, ‘అవసరమైతే ఉచితంగా సినిమా చూపిస్తా..’ అని కూడా పవన్ అన్నారు. సో, పవన్ నుంచి ‘భీమ్లానాయక్’ ద్వారా ఎలాంటి సంకేతం బయటకు వస్తుందన్నది ఒకింత ఆసక్తికరమే.
అయితే, ప్రభుత్వం ఓ విధానపరమైన నిర్ణయమంటూ తీసుకుంటే, అది అందరికీ వర్తింపజేయాలి. రోజుకి ఐదు షోల ప్రదర్శన, తొలి వారం టిక్కెట్ ధరల పెంపు.. వంటివాటిపై జగన్ ప్రభుత్వం ఎప్పుడు నిర్ణయం తీసుకున్నా, ఆ వెంటనే ‘భీమ్లానాయక్’ వచ్చేస్తుంది.. దానికి ఆయా వెసులుబాట్లన్నీ కల్పించాలి. అదే జరిగితే, ‘భీమ్లానాయక్’ సంచలనాలకు కేంద్ర బిందువవుతుందనడం నిస్సందేహం.