Bheemla Nayak : ఆలస్యం అమృతం విషం అన్నారు పెద్దలు.అంటే, ‘ఔను’ అనే భావన పవన్ కళ్యాణ్ అభిమానుల్లోనూ వ్యక్తమవుతోంది. ‘కరడుగట్టిన’ పవన్ కళ్యాణ్ అభిమానులైతే, ‘సినిమా ఎప్పుడొచ్చినా తగ్గేదే లే..’ అంటున్నారు. కానీ, సాధారణ అభిమానుల పరిస్థితి ఇందుకు పూర్తి భిన్నం.
నిజానికి, కరడుగట్టిన అభిమానుల్లోనూ కొందరు, ఈ ఆలస్యాన్ని జీర్ణించుకోలేకపోతున్నారు. సంక్రాంతికి రావాల్సిన సినిమా, కోవిడ్ సహా అనేక కారణాలతో ఫిబ్రవరి 25కి వాయిదా పడింది. ఈ పాపంలో ‘ఆర్ఆర్ఆర్’, ‘రాధేశ్యామ్’ తదితర చిత్రాలకూ వాటా వుందనుకోండి.. అది వేరే సంగతి.
ఇక, ‘భీమ్లానాయక్’ సినిమాకి సంబంధించి ఇంకా షూటింగ్ అప్డేట్స్ వస్తూనే వున్నాయి. అంటే, సినిమా నిర్మాణం ఇంకా పూర్తి కాలేదని అనుకోవాలేమో. సినిమా పూర్తి కానప్పుడు, ‘మేం రెడీ..’ అని నిర్మాత గతంలో ఎందుకు ప్రకటించారు.. వీలు చిక్కినప్పుడల్లా అదే మాట ఎలా చెప్పగలుగుతున్నారు.?
ఎక్కడో ఏదో తేడా కొడుతోంది. రీషూట్స్ అవుతున్నాయా.? లేదంటే, సరైన సమయం కోసమే వేచి చూస్తున్నారా.? ఇవేవీ కాదు, ఆంధ్రప్రదేశ్ ప్రభుత్వంతో ‘పంచాయితీ’ ఎందుకు అనుకుని వెనకడుగు వేస్తున్నారా.? ఏమో, అభిమానులైతే తెరవెనుకాల ఏం జరుగుతోందో అర్థం కాక జుట్టు పీక్కుంటున్నారు.
పవన్ కళ్యాణ్ ఎక్కడ.? తన సినిమా గురించి ఆయనెందుకు స్పష్టత ఇవ్వడంలేదు.? అన్న విమర్శలు సోషల్ మీడియా వేదికగా దూసుకొస్తున్నాయి. నిర్మాణ సంస్థ కూడా ఈ తాజా పరిణామాలపై స్పష్టత ఇవ్వలేని పరిస్థితి రావడం ఆశ్చర్యకరం.