Varma’s Divorce Paitham : పెళ్ళి చేసుకున్నోళ్ళంతా తప్పు చేసినట్టు.. విడాకులు తీసుకున్నోళ్ళంతా మంచి పని చేసినట్టు.! ఇదీ వర్మాయణం. తనను ఎవరూ పట్టించుకోవడంలేదన్న భావన కలిగితే ఆ వెంటనే, ఎవరో ఒకర్ని కెలకడం వర్మకి బాగా అలవాటు. సందర్భం వున్నా, లేకున్నా.. కల్పించుకుని మరీ ‘మెగా’ కాంపౌండ్ మీద బురద చల్లడం వర్మకి వెన్నతో పెట్టిన విద్య. చిరంజీవి, పవన్ కళ్యాణ్.. ఇలా వర్మ ఎవర్నీ వదిలిపెట్టడు. ట్విట్టర్ వేదికగా రెట్టలు వేస్తూనే వుంటాడు.
మెగా కాంపౌండ్ మీద వర్మకి ఎందుకు అంత అక్కసు.? అన్నది వేరే చర్చ. ఇక, వర్మ విడాకుల వ్యవహారానికి వద్దాం. అంటే, వర్మ ఎప్పుడో తన భార్యకు దూరమైన వ్యవహారానికి సంబంధించి కాదు. ఈ మధ్య సినీ సెలబ్రిటీలెవరన్నా విడాకులు తీసుకుంటే చాలు, తగుదునమ్మా.. అంటూ రంగంలోకి దూకేస్తుంటాడు. ‘కందకు లేని దూల కత్తిపీటకేల.?’ అన్న చందాన, ఎవరికీ లేని దురద.. ఫాఫం వర్మకే ఎక్కువ ఇలాంటి విషయాల్లో.
తమిళనటుడు ధనుష్, ఐశ్వర్య విడాకులు తీసుకున్న నేపథ్యంలో వర్మ, ట్వీట్ల పరంపరతో విరుచుకుపడిపోయాడు. ఏంటీ ఖర్మ.? అంటూ వర్మని అభిమానించే ఆ కొంతమంది కూడా విసుక్కున్నారంటే వర్మ పైశాచికత్వం ట్విట్టర్ వేదికగా ఏ స్థాయిలో కొనసాగిందో అర్థం చేసుకోవచ్చు.
తన వైవాహిక జీవితం నాశనమైపోయింది కాబట్టి, ప్రపంచంలో ఎవరి వైవాహిక జీవితం కూడా సరిగ్గా నడవకూడదని కోరుకునేంత పైశాచికత్వం వర్మలో పెరిగిపోవడం ఆశ్చర్యకరమేమీ కాదు. వర్మ అంటేనే పైత్యం, పైశాచికత్వం. అసలు ఇలాంటోడి గురించి మాట్లాడుకోవడం దండగ.. అని చాలామంది చాలాసార్లు అనుకున్నా, వాళ్ళకి అలా విరక్తి చెందే ఛాన్స్ ఇస్తూనే, తన గురించి మాట్లాడుకునేలా చేయగల నేర్పరి రామ్ గోపాల్ వర్మ.
తీసే సినిమాల్లో క్వాలిటీ, క్లారిటీ ఎప్పుడో పోయాయ్. ఎవరి పంచనో చేరి, వాళ్ళ దయాదాక్షిణ్యాలతో, వాళ్ళకి తగ్గట్టుగా సినిమాలు చేసే స్థాయికి దిగజారిపోయిన వర్మ, సోషల్ మీడియాలో తన ట్వీట్లను కూడా ఎవరికో అమ్ముడుపోయినట్లుగా వదులుతుండడం దిగజారుడుతనానికి పరాకాష్ట.