OG Movie: టాలీవుడ్ హీరో డిప్యూటీ సీఎం పవర్ స్టార్ పవన్ కళ్యాణ్ ప్రస్తుతం ఒకవైపు సినిమాలలో నటిస్తూనే మరొకవైపు రాజకీయాలలో ఫుల్ యాక్టివ్ గా ఉన్న విషయం తెలిసిందే. పవన్ కళ్యాణ్ డిప్యూటీ సీఎం కాకముందు ఎన్నికల కంటే ముందు నాలుగైదు సినిమాలకు సైన్ చేసిన విషయం తెలిసిందే. అందులో కొన్ని సినిమాలు మధ్యలోనే షూటింగ్ ఆగిపోయాయి. ఇక ఇటీవలే ఆ సినిమాలను మళ్ళీ పూర్తి చేయాలని షూటింగ్స్ ని కూడా మొదలుపెట్టారు పవన్ కళ్యాణ్. పవన్ కళ్యాణ్ నటిస్తున్న సినిమాలలో ఓజీ సినిమా కూడా ఒకటి.
సుజిత్ దర్శకత్వం వహిస్తున్న ఈ సినిమాలో ప్రియాంక అరుణ్ మోహన్ హీరోయిన్ గా నటిస్తోంది. శ్రియా రెడ్డి కీల‌క పాత్ర‌ను పోషిస్తున్న ఈ చిత్రానికి తమన్ సంగీతాన్ని అందిస్తున్నారు. తాజాగా తమన్ తన పుట్టినరోజు సందర్భంగా ఒక ఇంటర్వ్యూలో పాల్గొన్నారు. ఈ ఇంటర్వ్యూలో చేసిన వ్యాఖ్య‌లు ప్రస్తుతం సోష‌ల్ మీడియాలో వైర‌ల్‌ గా మారాయి. ఓజీ మూవీలో రమణ గోగులతో ఒక పాట పాడించాలని చూస్తున్న‌ట్లు తమన్ తెలిపారు. ఓజీ కోసం అకిరా నందన్ ను పిలుస్తానని తమన్ తెలిపారు.
గ‌తంలో రెండు నెల‌లు అకిరా త‌న‌తో ప‌ని చేసిన‌ట్లు కూడా ఆయన వెల్ల‌డించారు. దీంతో పవన్ ఫ్యాన్స్ తెగ సంతోష ప‌డుతున్నారు. ఇక పవన్ కుమారుడు అకిరా పియానో అద్భుతంగా ప్లే చేస్తాడు అన్న సంగ‌తి తెలిసిందే. తమన్ చెప్పిన మాట‌ల‌ను బ‌ట్టి అకిరా ఓజీ సినిమాకు సంగీతం అందివ్వ‌నున్నాడ‌ని అంటున్నారు. కాగా అకిరా ప్రస్తుతం మ్యూజిక్ నేర్చుకుంటున్నాడు. ఒకవేళ అకీరా నిజంగానే తండ్రి పవన్ కళ్యాణ్ ఓజీ సినిమాకు మ్యూజిక్ ని అందిస్తే మాత్రం అభిమానుల ఆనందానికి అవధులు లేకుండా పోతాయని చెప్పాలి.