Pushpa Techniques : ‘పుష్ప’ సినిమాలో అల్లు అర్జున్ ఎర్రచందనం స్మగ్లర్గా నటించాడు. తనదైన తెలివితేటలతో ఎర్రచందనం మాల్ని చెక్ పోస్టులు దాటించేస్తాడీ సినిమాలో హీరో బన్నీ. సినిమా సూపర్ హిట్టు. హీరోగా బన్నీ క్రియేట్ చేసిన ఇంపాక్ట్ కూడా బంపర్ హిట్టు. కానీ, రియల్ లైఫ్లో ఇలా చేస్తే ఇక అంతే లైఫ్ ఫట్.!
ఒరిస్సాకు చెందిన ఓ స్మగ్లింగ్ ముఠా బన్నీసినిమాలోని స్మగ్లింగ్ తెలివితేటల్ని రియల్ లైఫ్లోనూ ప్రదర్శించేయాలనుకున్నారు. దాదాపు 80 కేజీల గంజాయిని ఒరిస్సా నుంచి హైద్రాబాద్కు తరలించాలనే వారి ప్రయత్నానికి మధ్యలోనే బ్రేక్ పడింది.
గంజాయి స్మగ్లింగ్లో భాగంగా పరుపుల్లో దూదికి బదులు గంజాయిని నింపేసి తెలివిగా చెక్ పోస్టులు దాటించేయాలని ప్లాన్ చేసింది ఈ ముఠా. అనుకున్నట్లుగానే అంతా సిద్ధం చేశారు.
కొన్ని వందల పరుపులు కొనుగోలు చేసి, వాటికి బిల్లులు కూడా సిద్ధం చేసుకున్నారు.
పరుపుల్లోంచి దూదిని తీసేసి, గంజాయిని కుక్కి చక్కగా కుట్టేశారు. చూస్తే ఏ మాత్రం అనుమానం రాదు. అలాగే చాలా చెక్ పోస్టులు దాటించేశారు. హైద్రాబాద్ బార్డర్ దాకా వచ్చేశారు. కానీ, తెలంగాణా పోలీసులు ఈ స్మగ్లర్ల ఎత్తుల్ని చిత్తు చేసేశారు.
అసలే డ్రగ్స్ దందాతో హైద్రాబాద్ అట్టుడికిపోతోంది. దాంతో సెక్యూరిటీ టైట్ చేసేశారు. నిఘా పెంచేశారు.
అలా పాపం.! ఈ గంజాయ్ స్మగ్లర్లు పోలీసులకు అడ్డంగా దొరికేశారు. గంజాయ్ మాల్తో పాటు దాన్ని తరలించిన వ్యానును, తీసుకొచ్చిన వ్యక్తుల్నిఅదుపులోకి తీసుకుని కేసు ఫైల్ చేశారు. స్మగ్లర్లే కాదు, పోలీసులు కూడా తగ్గేదె.. లె.!