RRR Tickets Row : ‘ఆర్ఆర్ఆర్’ చాలా పెద్ద సినిమా. ఇందులో ఎవరికీ ఎలాంటి సందేహాల్లేవు. నెలల తరబడి, సంవత్సరాల తరబడి చేసిన సినిమా ఇది. ఈ సినిమా కోసమే చరణ్, ఎన్టీయార్ చాలా ప్రాజెక్టుల్ని పక్కన పెట్టేయాల్సి వచ్చింది. చరణ్ అయితే, ‘ఆచార్య’ చేసేస్తున్నాడనుకోండి.. అది వేరే సంగతి. ఎన్టీయార్ పరిస్థితి వేరు. రాజమౌళి గురించి ప్రత్యేకంగా చెప్పాల్సిన పనిలేదు.
భారీగా ఖర్చు చేశారు కాబట్టి, ‘ఆర్ఆర్ఆర్’ టిక్కెట్ల ధరల్ని తొలి వారం పెంచుకోవాలనుకోవడం తప్పేమీ కాకపోవచ్చు. కానీ, మరీ ఇంత దారుణంగానా.? ఇప్పుడు ఇదే చర్చ సర్వత్రా జరుగుతోంది. ‘పేదల కోసమే సినిమా టిక్కెట్ల ధరలు తగ్గించాం..’ అంటూ చెప్పుకున్న ఏపీ ప్రభుత్వం, ఆ తర్వాత మాట మార్చి ‘ఆర్ఆర్ఆర్’ సినిమా కోసం ప్రత్యేక వెసులుబాట్లు ఇచ్చింది టిక్కెట్ల ధరలు పెంచుకోవడానికి.
తెలంగాణ ప్రభుత్వం ‘ఆర్ఆర్ఆర్’ సినిమా కోసం అప్పటికే పెంచిన ధరలకు అనుగుణంగా మరింత వెసులుబాటు ఇచ్చింది. అంతిమంగా ఇక్కడ నష్టపోతున్నది సగటు సినిమా ప్రేక్షకుడే. టిక్కెట్ల ధరలు మరీ దారుణంగా పెరిగిపోయాయి. ఎంత గొప్ప సినిమా అయినా కావొచ్చు.. మరీ ఇంత ఎక్కువ ధరలా.? అన్న చర్చ సగటు సినీ ప్రేక్షకుడిలో కనిపిస్తోంది.