RRR : ‘బాహుబలి’ సినిమా విషయంలో రాజమౌళి మార్కెంట్ వ్యూహాలు భారతీయ సినిమాని నివ్వెరపరిచాయి. ఆ సినిమా గురించి మాట్లాడకపోతే ‘నేరం’ అనే స్థాయికి వెళ్ళిపోయింది అప్పుడు పరిస్థితి. అలాంటి యుఫోరియా సృష్టించడం అనేది కేవలం రాజమౌళికి మాత్రమే చెల్లింది. ఇప్పుడు అంతకు మించి.. అనే స్థాయిలో ‘ఆర్ఆర్ఆర్’ సినిమా గురించి మాట్లాడుకుంటున్నారు.
సినిమా గురించి పాజిటివ్గా మాట్లాడటమో, నెగెటివ్గా దుష్ప్రచారం చేయడమో.. ఏదో ఒకటి జరగాల్సిందే తప్ప, సినిమాని ఇగ్నోర్ చేయడానికి వీల్లేదు. అలాంటి పరిస్థితిని రాజమౌళి తీసుకొచ్చేశాడు. సినిమా టిక్కెట్ ధర ఏకంగా 5 వేలకు పైనేనట.. అది కూడా ప్రీమియర్ షోలకి. ఇంతకన్నా దారుణం ఇంకేమన్నా వుంటుందా.?
ఎందుకు వుండదు.? తెలుగు రాష్ట్రాల్లోని ప్రభుత్వాల్ని ఒప్పించి టిక్కెట్ ధరల పెంపుకు అనుమతులు సంపాదించారు. గరిష్టంగా సినిమా టిక్కెట్ ధర తెలగు రాష్ట్రాల్లో దాదాపు 500 రూపాయల్ని టచ్ చేస్తోంది. అన్ని థియేటర్లలోనూ సినిమా టిక్కెట్ ధరలు బాగానే పెరుగుతున్నాయ్.
కానీ, ఆర్ఆర్ఆర్ సినిమాతోనే ఇదంతా ఆగిపోతుందా.? అంటే, మళ్ళీ రాజమౌలి నుంచి ఇంకేదన్నా సినిమా వస్తే, దానికి ఈ మేనియా ఇలాగే వుండొచ్చు. అయితే, ‘బాహుబలి’కీ ఇప్పటికీ చాలా తేడా. ఓటీటీ ప్రభావం సహా చాలా అంశాలు సినిమాపై చిత్ర విచిత్రమైన ప్రభావాల్ని చూపిస్తున్నాయి. రాజకీయాల సంగతి సరే సరి.
ఏదిఏమైనా, ‘ఆర్ఆర్ఆర్’ సినిమా సృష్టించబోయే సంచలనాలు కనీ వినీ ఎరుగని స్థాయిలోనే వుంటాయన్నది నిర్వివాదాంశం. ఇప్పటికే ఈ సినిమాని దాదాపు అన్ని సినీ పరిశ్రమలూ తమ సినిమా.. అన్న భావన వ్యక్తం చేస్తున్నాయి. ఔను, ఇది మన సినిమా.. మన ఇండియన్ సినిమా.