RRR Gets It Date : ఎట్టకేలకు ‘ఆర్ఆర్ఆర్’ తాజా రిలీజ్ డేట్ బయటకొచ్చింది. మార్చి 25న సినిమా విడుదల కాబోతోంది. ఇండియన్ సినిమా స్క్రీన్‌పై అత్యంత ప్రతిష్టాత్మకంగా రూపొందుతోన్న సినిమాల్లో ‘ఆర్ఆర్ఆర్’ ముందు వరుసలో వుంటుందన్నది కాదనలేని వాస్తవం. టాలీవుడ్ మాత్రమే కాదు, కోలీవుడ్, బాలీవుడ్.. ఇలా అన్ని సినీ పరిశ్రమలూ ‘ఆర్ఆర్ఆర్’ విడుదల కోసం ఉత్కంఠగా ఎదురుచూస్తున్నాయి.
సంక్రాంతికి విడుదల కావాల్సిన ‘ఆర్ఆర్ఆర్’ వాయిదా పడటానికి అనేక కారణాలున్నాయి. అందులో, ఆంధ్రప్రదేశ్ ప్రభుత్వం తగ్గించిన సినిమా టిక్కెట్ల రేట్లు కూడా ఓ కారణం. కోవిడ్ మూడో వేవ్ సంగతి సరే సరి. నిజానికి, కోవిడ్ కారణంగా ‘ఆర్ఆర్ఆర్’ వాయిదా పడింది.. లేకపోతే, సినిమా ఎప్పుడో ఏడాది క్రితమే ప్రేక్షకుల ముందుకు వచ్చేసి వుండేది.
ఇంతకీ, మార్చి 25న అయినా ‘ఆర్ఆర్ఆర్’ ప్రేక్షకుల ముందుకు వస్తుందా.? ఇదొక మిలియన్ డాలర్ల ప్రశ్న అయిపోయిందిప్పుడు. కోవిడ్ భయాలు తగ్గిపోతున్నా, ఆంధ్రప్రదేశ్ రాష్ట్రంలో టిక్కెట్ల సమస్య ఇంకా అలానే వుంది. ఆంధ్రప్రదేశ్ ప్రభుత్వం, సినీ పరిశ్రమకి ఇంకా తీపి కబురు చెప్పలేదు. ఇంకా ఆ చేదు పరిస్థితులు అలాగే వున్నాయి.
అదనపు షోలు వేసుకోవడానికి వీల్లేదు.. టిక్కెట్ ధరలు పెంచుకోవడానికీ అవకాశం లేదు. ‘బలిసి కొట్టుకుంటున్నారు..’ అంటూ సినీ పరిశ్రమ మీద ఏపీ ప్రభుత్వంలో వున్న కొందరు కీలక నాయకులు కామెంట్లు చేస్తూనే వున్న దరిమిలా, ‘ఆర్ఆర్ఆర్’ సినిమా ప్రేక్షకుల ముందుకు రావడం ఖాయమేనా.? అన్న అనుమానాలు ఇంకా అలాగే వుండిపోయాయ్.