Ram Charan To Produce Jr NTR : యంగ్ టైగర్ ఎన్టీయార్, మెగా పవర్ స్టార్ రామ్ చరణ్ ఎంత మంచి స్నేహితులో ‘ఆర్ఆర్ఆర్‘ సినిమా మొదలయ్యాకే అందరికీ తెలిసింది. నిజానికి, అంతకన్నా ముందే వీరిద్దరూ మంచి స్నేహితులు.
కానీ, మెగా పవర్ స్టార్ వర్సెస్ యంగ్ టైగర్.. అంటూ అభిమానులు వైరం పెంచుకున్నారు గతంలో. అదిప్పుడు దాదాపుగా కనిపించడంలేదు. చాలా తక్కువగా కొందరు నెగెటివిటీని ప్రచాచం చేసేందుకు లేని వైరాన్ని ప్రచారంలోకి తెస్తున్నారు.
తాజాగా యంగ్ టైగర్ ఎన్టీయార్ ఓ థ్యాంక్స్ నోట్ విడుదల చేశాడు. అందులో రామ్ చరణ్ లేకపోతే తాను లేనన్నట్టుగా వ్యాఖ్యానించాడు. మై బ్రదర్.. అంటూ రామ్ చరణ్ గురించి ఎన్టీయార్ పేర్కొన్నాడు. ఈ ఇద్దరి మధ్య అనుబంధం అలాంటిది మరి.
అసలు విషయంలోకి వస్తే, యంగ్ టైగర్ ఎన్టీయార్ హీరోగా రామ్ చరణ్ నిర్మాతగా ఓ సినిమా తెరకెక్కబోతోందట. ఓ ప్రముఖ దర్శకుడు ఇప్పటికే కథ సిద్ధం చేశాడని అంటున్నారు. ఆ దర్శకుడు ఇటు చరణ్కీ అటు ఎన్టీయార్కీ అత్యంత సన్నిహితుడని సమాచారమ్.
రామ్ చరణ్కి చెందిన కొణిదెల ప్రొడక్షన్స్ పతాకంపైనే ఈ సినిమా రూపొందబోతోందట. యాక్షన్ ఎంటర్టైనర్గా ఈ సినిమా వుండబోతోందనీ, కేవలం చరణ్ ఈ సినిమాకి నిర్మాతగా మాత్రమే వుంటాడనీ తెలుస్తోంది. ఈ ప్రచారంలో నిజమెంతో తెలియాలంటే కొంత కాలం వేచి చూడాల్సిందే.
‘ఆర్ఆర్ఆర్’ తర్వాత చరణ్, శంకర్ దర్శకత్వంలో సినిమాపై ఫోకస్ పెట్టాడు. కొరటాల శివ దర్శకత్వంలో ఎన్టీయార్ ఓ సినిమా చేయాల్సి వుంది. కొరటాల – చిరంజీవి – చరణ్ కాంబినేషన్లో రూపొందిన ‘ఆచార్య’ విడుదలకు సిద్ధమైన సంగతి తెలిసిందే.