RRR : లక్షల్లో కాదు, కోట్లల్లోనే నష్టం వచ్చి పడుతుంది పెద్ద పెద్ద సినిమాల విడుదల వాయిదా పడటమంటే. మరి, ‘ఆర్ఆర్ఆర్’ లాంటి పాన్ ఇండియా సినిమా వాయిదా పడటమంటే, తద్వారా వచ్చే నష్టం ఎలా వుంటుంది.? కనీ వినీ ఎరుగని స్థాయిలోనే వుండొచ్చు.
జనవరి 7న ‘ఆర్ఆర్ఆర్’ సినిమా విడుదలవ్వాల్సి వుంది. కానీ, జనవరి 1న ‘ఆర్ఆర్ఆర్’ టీమ్ షాక్ ఇచ్చింది సినిమా విడుదల వాయిదా వేస్తున్నట్లు ప్రకటించడం ద్వారా. నిర్మాతల ముందు వేరే ఆప్షన్ లేకుండా పోయింది సినిమా విషయమై. దేశవ్యాప్తంగా నెలకొన్న ‘ఒమిక్రాన్’ భయాలే అందుకు కారణం.
చాలా రాష్ట్రాలు ఆంక్షలు విధించడం మొదలెట్టాయి. జనవరి 7 నాటికి పరిస్థితులు ఎలా వుంటాయో చెప్పలేం. ‘ఆర్ఆర్ఆర్’ సినిమా విడుదలవడం ప్రస్తుత పరిస్థితుల్లో కష్టమేనని వారం పది రోజుల నుంచీ చర్చ జరుగుతూనే వుంది. అయినాగానీ, మొండిగా సినిమా ప్రమోషన్లను నిర్వహిస్తూ వచ్చింది ‘ఆర్ఆర్ఆర్’ టీమ్.
రామ్చరణ్, జూనియర్ ఎన్టీయార్, రాజమౌళి, అలియా భట్.. దాదాపుగా దేశంలోని పలు ప్రధాన నగరాల్లో చక్కర్లు కొట్టేశారు సినిమా ప్రమోషన్ల కోసం. టీవీ షోలలో కనిపించారు.. నానా హంగామా చేశారు. అత్యద్భుతమైన రీతిలో ప్రమోషనల్ ఈవెంట్స్ నిర్వహించారు. వీటికే కోట్లాది రూపాయలు ఖర్చు చేసినట్లు తెలుస్తోంది.
ఇప్పుడు అదంతా బూడిదలో పోసిన పన్నీరేనన్నది నిర్వివాదాంశం. ఓ నెల రోజుల తర్వాత ‘ఆర్ఆర్ఆర్’ సినిమా విడుదలవుతుందా.? అంటే, ఇప్పుడే చెప్పలేం. అన్ని పరిస్థితులూ అనుకూలంగా వుండాలి.. అప్పటికి పెద్ద సినిమాలేమీ అడ్డంకి కాకూడదు. అంటే, రెండు మూడు నెలల తర్వాతే.. ఆ మాటకొస్తే, ఐదారు నెలలు పట్టినా పట్టొచ్చు. అప్పటికి మళ్ళీ ప్రమోషనల్ ఈవెంట్స్ షురూ చేసుకోవాలి. కానీ, తప్పదు.