అక్కినేని నాగార్జున సూపర్ హిట్ సినిమాల్లో ‘సోగ్గాడే చిన్నినాయన’ కూడ ఒకటి. 2015 లో విడుదలైన ఈ చిత్రం కుటుంబ ప్రేక్షకుల్ని విశేషంగా ఆకట్టుకుని భారీ విజయాన్ని అందుకుంది. ఈ చిత్రంలో నాగార్జున చేసిన బంగార్రాజు పాత్రకు విశేషమైన స్పందన లభించింది. దీంతో దర్శకుడు కళ్యాణ్ కృష్ణ, నాగార్జున ఇద్దరూ ఆ చిత్రానికి సీక్వెల్ తీయాలని గతంలోనే నిర్ణయించుకున్నారు. సినిమాకు ‘బంగార్రాజు’ అనే టైటిల్ కూడ నిర్ణయించారు. స్క్రిప్ట్ కూడ సిద్ధమైంది. ప్రజెంట్ ప్రీప్రొడక్షన్ పనులు ముమ్మరంగా జరుగుతున్నాయి.
ఇదిలా ఉంటే ఈ చిత్రంలో ‘ఆర్ఎక్స్ 100’ బ్యూటీ పాయల్ రాజ్ పుత్ ఒక స్పెషల్ సాంగ్ చేయనుందని వార్తలు మొదలయ్యాయి. ఈ హాట్ బ్యూటీ ఇదివరకు స్పెషల్ సాంగ్స్ చేసి ఉండటంతో ఈ వార్తలు నిజమే అనుకున్నారు చాలామంది. కానీ అవన్నీ కేవలం రూమర్స్ మాత్రమేనని తేల్చేసింది పాయల్. తాను ఎలాంటి ప్రత్యేక గీతంలోనూ నటించట్లేదని క్లారిటీ ఇచ్చింది. ఇకపోతే పాయల్ రాజ్ పుత్ పలు భాషల్లో సినిమాలతో పాటు ఓటీటీ ప్రాజెక్ట్స్ కూడ చేస్తోంది.