హీరోగా మంచి సినిమాలు చేస్తాడనే పేరు తెచ్చుకున్న నాని నిర్మాతగా కూడ అదే తరహాలో వెళ్తున్నారు. నిర్మాణ సంస్థను ప్రారంభించేటప్పుడే డిఫరెంట్ సినిమాలు చేస్తానని చెప్పుకొచ్చిన ఆయన ‘అ!, హిట్’ చిత్రాలతో ఆ మాట నిలబెట్టుకున్నాడు. ఇప్పుడు అదే పంథాలో ఇంకొక ప్రయత్నం చేస్తున్నారు. తన నిర్మాణంలో ‘మీట్ క్యూట్’ అనే కొత్త చిత్రాన్ని నిన్ననే ప్రకటించారు ఆయన. ఈ సినిమా నానికి చాలా ప్రత్యేకమైంది. ఎందుకంటే ఈ సినిమాకు దర్శకురాలు దీప్తి గంట ఆయనకు సోదరి. దీప్తికి డైరెక్టర్ అవ్వాలనేది డ్రీమ్. గతంలో షార్ట్ ఫిలిమ్స్ కూడ చేసింది.
చెలెల్లి కలను నిజం చేయడానికి నాని ఒకడుగు ముందుకువేశారు. చెల్లెలి మీద నమ్మకం ఉంచి నిర్మాణ బాధ్యతలను భుజాన వేసుకున్నారు. ఇదొక మల్టీస్టారర్ చిత్రం. ఇందులో పలువురు పేరున్న నటీమణులు నటిస్తున్నారు. పేర్లు గోప్యంగా ఉంచారు కానీ హీరోయిన్లు అందరూ మాత్రం లైన్ లైట్లో ఉన్నవారేనని తెలుస్తోంది. సత్యరాజ్ లాంటి సీనియర్ నటుడు కూడ ఇందులో నటిస్తున్నారు. ఇది కూడ తన బ్యానర్లో వచ్చిన గత చిత్రాల తరహలోనే భిన్నంగా ఉంటుందని అంటున్నారు నాని. చిత్రాన్ని నెలన్నర రోజుల్లో పూర్తి చేయాలని ప్లాన్ చేస్తున్నారు. ఈ ప్రయత్నంతో సోదరిని దర్శకురాలిగా నిలబెట్టాలనేది నాని లక్ష్యం.