తెలుగుదేశం పార్టీ జాతీయ ప్రధాన కార్యదర్శి, మాజీ మంత్రి నారా లోకేష్ ఈ మధ్య పొలిటికల్ హడావిడి కాస్త ఎక్కువే చేస్తున్నారు. ప్రతిపక్షంలో వున్నారు కదా.. పైగా, కాబోయే ముఖ్యమంత్రి అనే ట్యాగ్ కూడా ఆయనకు ఇప్పుడు అంటగట్టేస్తున్నారు టీడీపీ మద్దతుదారులు.. దాంతో, లోకేష్ హంగామా రోజురోజుకీ ఎక్కువైపోతోంది. వయోభారం నేపథ్యంలో టీడీపీ అధినేత నారా చంద్రబాబునాయుడు అంత విరివిగా జనాల్లోకి వెళ్ళలేకపోతున్నారు. ఈ నేపథ్యంలో నారా లోకేష్, అనధికారికంగానే పార్టీ బాధ్యతలు పూర్తిగా తీసేసుకున్నట్లు కనిపిస్తోంది. అధికార పక్షంపై విరుచుకుపడ్డంలో నారా లోకేష్ తనదైన ప్రత్యేకతను చూపిస్తున్నారు. సరే, లోకేష్ తీరుపై అధికార పక్షం నుంచి అంతకన్నా ఘాటుగా విమర్శలు రావడం వింతేమీ కాదు. అయితే, ప్రతిపక్షం బలపడే ఛాన్స్ ఎప్పుడు అధికారంలో వున్నవారే ఇస్తుంటారు. అధికార పార్టీ చేసే తప్పిదాలు, విపక్షాలకు బలం. చంద్రబాబు రాజకీయంగా బలహీనపడిన మాట వాస్తవం.
ఆ ఘనత వైసీపీ అధినేత వైఎస్ జగన్ మోహన్ రెడ్డికే చెందుతుంది. 2019 ఎన్నికల్లో టీడీపీ ఘోర పరాజయం సాధించడంతో, చంద్రబాబులో ఆత్మవిశ్వాసం దెబ్బతింది. అయితే, నారా లోకేష్ జనంలోకి వెళుతున్న తీరు, ఆయనకు లభిస్తున్న ఘనమైన ప్రజా స్పందన.. ఇవన్నీ చంద్రబాబులో కొత్త ఉత్సాహాన్ని పెంచుతున్నాయన్నది నిర్వివాదాంశం. అయినాగానీ, టీడీపీ ప్రస్తుత పరిస్థితుల్లో అధికార వైసీపీని ఢీకొనేంత శక్తినైతే కలిగి లేదు. ఇదిలా వుంటే, నారా లోకేష్ విమర్శలకు టీడీపీ నుంచి వస్తున్న సమాధానాలు చాలా అస్పష్టంగా కన్పిస్తున్నాయి. అధికారంలో వున్నవారు ఎదురుదాడి చేయడం సహజమే అయినా, ఆ ఎదురుదాడి.. అధికార పార్టీ స్థాయిని మరింత దిగజార్చేస్తుంది. విషయ పరిజ్ఞానం వున్ నేతల ద్వారా నారా లోకేష్ విమర్శలకు వైసీపీ గనుక కౌంటర్ ఇస్తే, అది వైసీపీకి.. అలాగే వైసీపీ ప్రభుత్వానికీ అడ్వాంటేజ్ అవుతుంది. లేదంటే మాత్రం, లోకేష్ బలం పుంజుకోవడం ఖాయం.. అదే వైసీపీకి సమస్యగా మారొచ్చు సమీప భవిష్యత్తులో.