టీడీపీకి కష్టాలు పెరిగిపోతున్నాయే గాని పూర్వ వైభవం వచ్చేలా లేదిక, 2019 ఎన్నికల తర్వాత నేతలు ఒక్కొక్కరుగా పార్టీని వీడుతున్నారు.. ముందు సీనియర్లు, చోటా మోటా నేతలు గోడ దూకేస్తే.. తర్వాత ఎమ్మెల్యేలు కూడా ఒక్కొక్కరుగా జారుకుంటున్నారు. ఎన్నికల్లో గెలిచిన 23మందిలో నలుగురు ఇప్పటికే జగన్కు జైకొట్టారు. ఇప్పుడు మరో ఎమ్మెల్యే అదే బాటలో నడిచేందుకు సిద్ధమైనట్లు తెలుస్తోంది. ఎమ్మెల్యే గంటా శ్రీనివాస్ కూడా జంప్ కొట్టేందుకు ముహూర్తం ఫిక్స్ చేసుకున్నట్లు జోరుగా ప్రచారం జరుగుతోంది.
ఈ నెల 3న గంటా శ్రీనివాస్ ముఖ్యమంత్రి వైఎస్ జగన్మోహన్రెడ్డిని కలవబోతున్నట్లు విశాఖలో టాక్ నడుస్తోంది. ఆ రోజు కుమారుడితో కలిసి సీఎంను కలిసి.. కుమారుడికి అధికార పార్టీ కండువా కప్పించాలని భావిస్తున్నారట. గంటా మిగిలిన టీడీపీ ఎమ్మెల్యేల బాటలోనే నడవాలనుకుంటున్నారట. కేవలం ముఖ్యమంత్రికి తన మద్దతు తెలపాలనుకుంటున్నారట. అయితే అధికారికంగా శ్రీనివాసరావు ఎలాంటి ప్రకటన చేయలేదు.
గంటా శ్రీనివాసరావు 2019 ఎన్నికల్లో విశాఖ ఉత్తరం నుంచి ఎమ్మెల్యేగా గెలిచారు. కొద్ది రోజులకే అధికార పార్టీలోకి వెళతారని ప్రచారం జరిగింది. కానీ ఆయన మాత్రం పార్టీ మారనని చెప్పారు.. ఆ తర్వాత కూడా పార్టీ మార్పుపై క్లారిటీ రాలేదు. చాలా రోజులుగా ఆయన అధికార పార్టీ వైపు చూస్తున్నారని చర్చ జరుగుతూనే ఉంది. రెండు వారాల క్రితమే టీడీపీ ఎమ్మెల్యే వాసుపల్లి గణేష్ కుమార్ ముఖ్యమంత్రిని కలిసి.. కుమారుల్ని వైఎస్సార్సీపీలో చేర్చారు. గంటా కూడా అదే బాటలో నడవాలని చూస్తున్నారట.