కరుణానిధి…. ఆ పేరు చెప్పగానే గుర్తుకు వచ్చేది ఆయన ముఖంలోని నల్ల కళ్లద్దాలు. గతం తరం వారు కరుణానిధిని కళ్లద్దాలు లేకుండా చూశారేమో కానీ ప్రస్తుత తరం వారైతే కరుణానిధిని కళ్ళద్దాలు లేకుండా చూడలేదు. కళ్లద్దాలు ఆయన ఎప్పుడూ పెట్టుకుంటారు. అయితే చాలా మందికి కరుణానిధి కళ్లద్దాలు ఎప్పుడూ ఎందుకు ధరిస్తారో తెలియదు. అయితే దాని వెనుక ఉన్న అసలు కథ మాత్రం ఇదే మీరూ చదవండి.
1953లో కరుణానిథి రాత్రి వేళ తిరుచ్చికి కారులో ప్రయాణిస్తుండగా కారు ప్రమాదానికి గురైంది. అందులో ప్రయాణిస్తున్న వారంతా క్షేమంగా బయటపడినా కరుణానిధి ముక్కుకు గాయమైంది. ప్రథమ చికిత్స చేయించుకొని కరుణానిధి తిరుచ్చికి వెళ్లి పోయారు. పొద్దుగాల లేచి చూసుకునే సరికి కరుణానిధి ముఖం వాచిపోయి ఎడమ కన్ను నొప్పి పుట్టిందట. దాంతో కరుణా నిధి వేలూరు ఆస్పత్రిలో చూపించుకోగా కంట్లో నరం దెబ్బ తిందని 6 నెలల పాటు చదవొద్దు, రాయవద్దు, బహిరంగ సభలలో కూడా మాట్లాడవద్దని డాక్టర్లు చెప్పారు. కానీ కరుణానిధి అవేవి పట్టించుకోకుండా మిత్రులు నారాయణ, ఎస్ఎస్ఆర్ కోరిక మేరకు మణిమకుటం నాటకానికి క్లైమాక్స్ రాస్తుండగా మళ్లీ ఎడమ కన్ను నొప్పి పుట్టిందట. అప్పుడు చైన్నై ఆస్పత్రిలో చికిత్స తీసుకున్నారు. 1967 లో మళ్లీ కారు ప్రమాదం కావడంతో కరుణకు కంటి నొప్పి తిరగబెట్టిందట. 1971 లో డాక్టర్ల సూచన మేరకు అమెరికా వెళ్లి శస్త్ర చికిత్స చేయించుకున్నారు. అప్పటి నుంచి కరుణానిధి క్రమం తప్పకుండా కళ్లద్దాలు పెట్టుకుంటారు. అది ఆయన ఫ్యాషన్ గా చాలా మంది అనుకుంటారు. అలా కరుణానిధి నిత్యం కళ్లద్దాలు ధరిస్తారు.