పవన్ కళ్యాణ్ నటిస్తున్న హరి హర వీరమల్లు చిత్రానికి సంబంధించిన ప్రచార హడావుడి మెల్లగా మొదలవుతోంది. తాజాగా ట్రైలర్‌కి సంబంధించిన గందరగోళానికి చెక్ పెడుతూ నిర్మాత ఏఎం రత్నం స్పష్టత ఇచ్చారు. ‘‘సీజీ పనులు పూర్తి కాగానే ట్రైలర్ వస్తుంది. ఇక సినిమా విడుదల తేదీ ఏ మాత్రం మార్చం. జూన్ 12న థియేటర్లలో ప‌వర్ స్టార్ వీరత్వాన్ని చూడొచ్చు,’’ అని ఆయన స్పష్టం చేశారు.
ఈ చిత్రం ప్రారంభంలో దర్శకుడిగా ఉన్న క్రిష్, కథను రూపొందించిన విధానం గురించి మాట్లాడుతూ, ‘‘ఈ కథకు పవన్ మాత్రమే సరిపోతాడు’’ అని చెప్పిన విషయాన్ని ఏఎం రత్నం గుర్తు చేశారు. కరోనా తర్వాత పరిస్థితులు మారిపోయినా ప్రాజెక్టును నిలిపిపెట్టకుండా జ్యోతికృష్ణ బాధ్యతలు స్వీకరించారని తెలిపారు. దర్శకుడి మార్పు అయితే జరిగినా, కథలో ఎలాంటి రాజీ లేదని అన్నారు. క్రిష్‌తో కలిసి జ్యోతికృష్ణ పని చేశారని, ఇది క్రియేటివ్ టీం మొత్తం కృషి ఫలమని చెప్పారు.
మొత్తానికి హరి హర వీరమల్లు ప్రచార కార్యక్రమాలు ఊపందుకుంటుండటంతో అభిమానుల్లో ఆసక్తి పెరుగుతోంది. ఇప్పటికే వచ్చిన టీజర్‌, ఫస్ట్ లుక్ పోస్టర్లు, పాటలు.. సినిమా మీద అంచనాలను పెంచేశాయి. చారిత్రక నేపథ్యంలో రూపొందుతున్న ఈ భారీ యాక్షన్ డ్రామాలో పవన్ పాత్ర కోసం ప్రత్యేకమైన శిక్షణ తీసుకున్నారని సమాచారం. ఎంఎం కీరవాణి సంగీతం, ఒక యుగాన్ని తలపించే విజువల్స్‌, స్టార్ క్యాస్టింగ్‌తో జూన్ 12న థియేటర్లలో ఈ సినిమా విడుదల కానుండటంతో పవన్ అభిమానులకు ఇది పండుగే అని చెప్పొచ్చు. ట్రైలర్ ఆలస్యం అయినా, ఎక్కడా క్వాలిటీ విషయంలో రాజీ పడట్లేదని నిర్మాత మాటల్లో స్పష్టమవుతుంది.
