రామ్ చరణ్, శంకర్ కాంబినేషన్‌లో రూపొందిన భారీ బడ్జెట్ చిత్రం ‘గేమ్ ఛేంజర్’ విడుదల సందర్భంగా జరిగిన పరిణామాలు ఇప్పుడు చర్చనీయాంశంగా మారాయి. ఈ చిత్రానికి సంబంధించి టికెట్ ధరల పెంపు, ప్రత్యేక షోల అనుమతులపై తెలంగాణ హైకోర్టు విచారణ జరిపింది. సినిమా బెనిఫిట్ షోలను రద్దు చేస్తూనే ప్రత్యేక షోలకి అనుమతి ఇవ్వడంపై హైకోర్టు ప్రశ్నలు లేవనెత్తింది.
హైకోర్టు విచారణలో అర్థరాత్రి, తెల్లవారుజాము షోలకి అనుమతి ఇవ్వడంపై గట్టి వ్యాఖ్యలు చేయడం గమనార్హం. ప్రజల భద్రతను దృష్టిలో ఉంచుకుని ఇలాంటి అనుమతులపై పునరాలోచన చేయాలని హోంశాఖ ప్రత్యేక కార్యదర్శిని ఆదేశించింది. సినిమా థియేటర్లలో జరిగే ఈ ప్రత్యేక షోలను కేవలం వసూళ్ల కోసం నిర్వహించడం సమంజసం కాదని హైకోర్టు తన అభిప్రాయాన్ని వ్యక్తం చేసింది.
అత్యధిక టికెట్ ధరలతో ప్రేక్షకులపై భారం వేయడం తగదని కోర్టు అభిప్రాయపడింది. సినిమా ప్రదర్శనలు ప్రేక్షకులకు సౌకర్యవంతంగా ఉండాలని, అవి వసూళ్ల కోసం కాకుండా వినోదాన్ని అందించడమే లక్ష్యంగా ఉండాలన్నది కోర్టు సూచనలు చేసింది. భారీ బడ్జెట్ సినిమాలు తీసినప్పుడు కూడా ప్రేక్షకుల ఆర్థిక పరిస్థితిని పరిగణనలోకి తీసుకోవాలని హైకోర్టు స్పష్టం చేసింది. ఈ విచారణపై తుదితీర్పు ఈ నెల 24వ తేదీకి వాయిదా పడింది. ఈ మధ్యకాలంలో పెద్ద సినిమాలకు సంబంధించిన టికెట్ ధరలు, ప్రత్యేక షోలపై నడుస్తున్న చర్చలో హైకోర్టు తాజా వ్యాఖ్యలు మరింత ప్రాధాన్యతను సంతరించుకున్నాయి.
