సింగం ఫేమ్ రాజశేఖర్ దర్శకత్వం వహించిన సినిమా మిస్ యు. ఈ చిత్రం లో సిద్ధార్థ్, ఆషికా రంగనాథ్ హీరో హీరోయిన్లుగా నటిస్తున్నారు. సెవెన్ మైల్స్ ఫర్ సెకండ్ ప్రొడక్షన్ నిర్మించిన ఈ చిత్రానికి గిబ్రాన్ సంగీతం అందించారు. ఈ సినిమా తెలుగు, తమిళ వెర్షన్స్ లో నవంబర్ 29న థియేటర్లలోకి రాబోతున్నాయి. తెలుగు వెర్షన్ లో ప్రమోషన్స్ ఆల్రెడీ ప్రారంభం అయ్యాయి. ఇప్పటికే రిలీజ్ అయిన పోస్టర్, టీజర్ ప్రేక్షకులను విశేషంగా ఆకట్టుకున్నాయి.
నిజానికి ఈ సినిమాని మొదట తమిళంలో మాత్రమే విడుదల చేయాలనుకున్నారు కానీ సిద్ధార్థ్ కి తెలుగులో ఉన్న క్రేజ్ ని దృష్టిలో పెట్టుకొని తెలుగులో కూడా విడుదల చేయాలని నిర్ణయించుకున్నారు మూవీ టీం . టాలీవుడ్ లో బొమ్మరిల్లు వంటి బ్లాక్ బస్టర్ హిట్ ఇచ్చిన సిద్ధార్థ గురించి ప్రత్యేకమైన పరిచయం అవసరం లేదు. చేసినవి తక్కువ సినిమాలే అయినా టాలీవుడ్ లో మంచి క్రేజ్ ని దక్కించుకున్నాడు. ఇక ఈ సినిమా ప్రమోషన్స్ లో భాగంగా ఈరోజు సినిమా ట్రైలర్ ని లాంచ్ చేశారు మూవీ టీం. లవ్, కామెడీ, యాక్షన్ అంశాలతో ఈ సినిమాని రూపొందించినట్లు ట్రైలర్ చూస్తే అర్థమవుతుంది.
ఇదొక లవ్ స్టోరీ రా అంటూ హీరో సిద్ధార్థ్ చెప్పే డైలాగ్ తో ట్రైలర్ స్టార్ట్ అవుతుంది. నైట్ షో కి వెళ్ళినప్పుడు నిద్ర వస్తే ఏం చేస్తారంటూ ఆషిక చెప్పే ఇన్నోసెంట్ డైలాగ్స్ నవ్వు తెప్పిస్తున్నాయి. ప్రేమలో పడిన ఇద్దరూ పెళ్లి చేసుకోబోయే సమయానికి ఎందుకు విడిపోయారు అని విషయంపై సస్పెన్స్ క్రియేట్ చేశారు మూవీ మేకర్స్. మన జీవితాల్లో హర్రర్ అండ్ లవ్ స్టోరీ స్క్రిప్ట్ ఒకటే మామ అనే డైలాగ్ తో ట్రైలర్ ముగుస్తుంది.
నచ్చిన దాని కోసం అన్ని విధాల ట్రై చేయాలి అని చెప్పే డైలాగ్ కూడా ట్రైలర్ కి హైలైట్ గా నిలిచిందని చెప్పొచ్చు. భారతీయుడు 2 సినిమాతో పరాజయాన్ని మూటగట్టుకున్న సిద్ధార్థ్ ఈ సినిమాతో అయినా హిట్ అందుకుంటాడా అనే విషయాన్ని పక్కన పెడితే లవర్ బాయ్ సిద్దు అతిధి రావు హైదరితో పెళ్లి జరిగిన తరువాత నటిస్తున్న మొదటి చిత్రం మిస్ యు. అతనికి మంచి సక్సెస్ ఇవ్వాలని కోరుకుంటున్నారు ప్రేక్షకులు.
