Saaree: ప్రముఖ దర్శకుడు రాంగోపాల్‌ వర్మ డెన్‌ నుంచి వస్తున్న ‘శారీ’ చిత్రం డిసెంబరు 20న థియేటర్‌లో విడుదల కానుంది. ఈ మేరకు మేకర్స్‌ అధికారికంగా రిలీజ్‌ డేట్‌ వెల్లడించారు. ఇందులో యువనటి ఆరాధ్య దేవి హీరోయిన్‌గా నటించగా, సత్య యాదు హీరో. పలు వాస్తవిక సంఘటనల ఆధారంగా ఈ సినిమాని సైకలాజికల్‌ థ్రిల్లర్‌ మూవీగా రూపొందించారు.
తమిళం, తెలుగు, హిందీ, మలయాళ భాషల్లో రూపొందిన ఈ చిత్రానికి గిరి కృష్ణ కమల్‌ దర్శకుడు. ఆర్జీవీ ఆర్వీ ప్రొడక్షన్స్‌ పతాకంపై ఈ సినిమా నిర్మితమైంది. అతి ప్రేమ భయంకరంగా ఉంటుందనేది ఈ సినిమా మూల కథ. సోషల్‌ మీడియాలో జరిగే కొన్ని ఊహించని విషయాల వల్ల సమాజంతో పాటు వ్యక్తిగత జీవితంలో జరిగే మార్పులు ఇందులో ప్రధానంగా ప్రస్తావించారు. ఇందులో భయపెట్టే ప్రేమికుడి పాత్రలో సత్య యాదు నటించారు.
కాగా.. ఈ చిత్రంలో నటించిన ఆరాధ్య దేవి కేరళకు చెందిన వర్థమాన నటి. గతంలో శ్రీలక్ష్మి అనే పేరుతో పరిశ్రమకు పరిచయమైంది. ఇన్‌స్టాగ్రామ్‌ ద్వారా ఎవరో తనకు ఫార్వార్డ్‌ చేసిన ఆరాధ్య రీల్స్‌ చూసి ఈమెను కనిపెట్టి కోత్త పేరు పెట్టి మరీ ఈ ‘శారీ’ చిత్రంలో హీరోయిన్‌గా రాంగోపాల్‌ వర్మ ఎంపిక చేయడం గమనార్హం. ఇప్పటికే విడుదలైన ఈ చిత్రం పోస్టర్లు ప్రేక్షకులను అమితంగా ఆకర్షించిన విషయం తెల్సిందే.
