ఒక సినిమా ఇండస్ట్రీకి చెందిన హీరోలు అప్పుడప్పుడు మరో భాషలోని హీరోల సినిమాలలో గెస్ట్ రోల్స్ చేయడం అన్నది మనం ఎప్పటి నుంచో చూస్తున్నాం. ఆయా హీరోల మధ్య వుండే చక్కని రిలేషన్ కి అవి నిదర్శనంగా నిలుస్తుంటాయి.
ఇప్పుడు కన్నడ చిత్రసీమలో స్టార్ హీరోగా వెలుగొందుతున్న పునీత్ రాజ్ కుమార్ కూడా అలాగే ఓ తెలుగు సినిమాలో గెస్ట్ రోల్ చేయడానికి ముందుకు వచ్చినట్టు తెలుస్తోంది. అది కూడా నందమూరి బాలకృష్ణ సినిమా కావడం ఇక్కడ విశేషం. బాలకృష్ణ హీరోగా ప్రముఖ దర్శకుడు బోయపాటి శ్రీను దర్శకత్వంలో తాజాగా భారీ యాక్షన్ సినిమా రూపొందుతున్న విషయం తెలిసిందే. ఈ సినిమాలో పునీత్ రాజ్ కుమార్ గెస్ట్ రోల్ చేయనున్నట్టు ప్రచారం జరుగుతోంది.
ఇందులో ఆయన పోలీస్ ఆఫీసర్ పాత్రలో కనిపిస్తాడనీ, హీరోకి హెల్ప్ చేసే పాత్ర అదనీ అంటున్నారు. ఆయన క్యారెక్టర్ ఇంటర్వెల్ తర్వాత వస్తుందట. మొత్తానికి ఇదే కనుక నిజమైతే, కన్నడ నాట కూడా ఈ చిత్రానికి మంచి క్రేజ్ ఏర్పడుతుంది.