ప్రభాస్ హీరోగా మారుతీ దర్శకత్వంలో రూపొందుతున్న ది రాజా సాబ్ చిత్రం ఏప్రిల్ 10న విడుదల కాకపోవచ్చని ఫిలిం నగర్‌లో వార్తలు హల్‌చల్ చేస్తున్నాయి. ఇంకా విఎఫెక్స్, పోస్ట్ ప్రొడక్షన్ పనులు పూర్తయ్యే సమయానికి విడుదల తేదీకి తగినంత సమయం ఉండదని భావిస్తున్నారు. పీపుల్స్ మీడియా ఫ్యాక్టరీ నిర్మిస్తున్న మరో ప్యాన్ ఇండియా మూవీ మిరాయ్ ఏప్రిల్ 18న విడుదలకు సిద్ధంగా ఉండడంతో, రాజా సాబ్ పోస్ట్‌పోన్ వార్తలకు బలం చేకూరుతోంది.
ఇదే సమయంలో యువి క్రియేషన్స్ నిర్మిస్తున్న చిరంజీవి విశ్వంభర ఫిబ్రవరిలో విడుదలకు సన్నద్ధమవుతుండటం విశేషం. టీజర్‌కు వచ్చిన నెగటివ్ ఫీడ్‌బ్యాక్ దృష్టిలో ఉంచుకుని, గ్రాఫిక్స్ పనులపై మళ్లీ దృష్టి సారించినట్లు సమాచారం. సంక్రాంతి పండుగ సందర్భంగా మొదటి లిరికల్ సాంగ్ విడుదల చేసి, సినిమాపై కొత్త బజ్ క్రియేట్ చేయాలని యువి టీమ్ ప్రయత్నిస్తోంది.
ప్రస్తుతం ప్యాన్ ఇండియా సినిమాలు చెప్పిన డేట్లకు విడుదల కాకపోవడం సాధారణంగా మారింది. రాజా సాబ్ కూడా అదే రూట్‌లో వెళ్లిపోతుందా లేక విశ్వంభర ముందుగా వస్తుందా అన్నది ఆసక్తికరంగా మారింది. నిధి అగర్వాల్, మాళవిక మోహనన్ కథానాయికలుగా నటించిన రాజా సాబ్ చిత్రంలో తమన్ సంగీతం ప్రధాన ఆకర్షణగా నిలవనుంది. మరి ఈ సినిమా అనుకున్న సమయానికి వస్తుందో లేదో తెలియాలి అంటే మరికొన్ని రోజులు ఆగాల్సిందే.