కోవిడ్ కారణంగా అతలాకుతలం అయిన చిత్ర పరిశ్రమకి ప్రాణం పోస్తూ కేంద్ర రాష్ట్ర ప్రభుత్వాలు ప్రత్యేకమైన సడలింపులివ్వటంతో వరుసపెట్టి షూటింగ్స్ జరుపుకుంటూ , పూర్తయిన సినిమాలన్నీ ఇబ్బడిముబ్బడిగా విడుదలకు సిద్ధమవుతున్నాయి. దీంతో పోటీ ఎక్కువయిపోయి కలెక్షన్స్ పరంగా ఇబ్బందులు ఎదుర్కునే పరిస్థితులు కలుగుతున్నాయి. తాజాగా టాలీవుడ్ లో రెండు సినిమాలు ఓకే విడుదల తేదీ ప్రకటించటంతో ఇండస్ట్రీలో హాట్ గా చర్చ జరుగుతుంది.
నేచురల్ స్టార్ నాని హీరోగా ‘నిన్ను కోరి’, ‘మజిలీ’ వంటి సున్నితమైన ప్రేమకథల్ని తెరకెక్కించి ప్రేక్షకులను ఆకట్టుకున్న శివ నిర్వాణ దర్శకత్వంలో ‘టక్ జగదీష్’ మూవీ ఏప్రిల్ 16న విడుదల కాబోతోందని ఈనెల 9న సినిమా విడుదల తేదీని ప్రకటించారు. ఇప్ప‌టికే షూటింగ్ పూర్తి చేసుకున్న ఈ మూవీ పోస్ట్ ప్రొడక్ష‌న్ ప‌నులు కూడా శ‌ర‌వేగంగా సాగుతున్నాయి. గతేడాది నాని, ఇంద్రగంటి మోహనకృష్ణ కంబినేషన్ లో వచ్చిన ఈ ‘V’ సినిమా ఓటీటీలో విడుదలవగా మిశ్రమ ఫలితాన్ని అందుకుంది. ఈ నేపథ్యంలో టక్ జగదీష్ మూవీతో తిరిగి ఫామ్ లోకి రావాలని అనుకుంటున్న నానికి, అక్కినేని నాగచైతన్య పెద్ద షాక్ ఇచ్చారు.
టాలెంటెడ్ డైరెక్టర్ శేఖర్‌ కమ్ముల దర్శకత్వంలో నాగచైతన్య ‘లవ్ స్టోరీ’ మూవీలో సాయి పల్లవితో కలిసి నటిస్తున్నారు. ఈ చిత్రాన్ని శ్రీ వెంకటేశ్వర సినిమాస్ ఎల్ఎల్‌పి, అమిగోస్ క్రియేషన్స్ సంస్థలు సంయుక్తంగా నిర్మిస్తున్నాయి. కె నారాయణదాస్ నారంగ్, పి.రామ్మోహన్ రావు నిర్మాతలు. షూటింగ్ కంప్లీట్ చేసుకున్న ఈ మూవీని స‌మ్మ‌ర్ కానుక‌గా ఏప్రిల్ 16న విడుదల చేస్తున్న‌ట్టు చిత్ర బృందం సోమవారం నాడు వెల్ల‌డించింది. దీంతో నాని, నాగచైతన్య సినిమాలు ఒకే రోజు రిలీజ్ అవుతూ పోటీపడబోతున్నాయి.
పెద్ద హీరోల సినిమాలు ఒకేరోజు విడుదలయినా వారికున్న అశేష అభిమానుల వలన కలెక్షన్స్ లో పెద్దగా ఇబ్బందులు ఉండవు. కానీ మీడియం రేంజ్ హీరోల సినిమాలు ఒకేరోజు వస్తే కలెక్షన్స్ మీద ప్రభావం బాగానే ఉంటుంది. లవ్ స్టోరీ ని నైజాంలో అత్యధిక థియేటర్లు కలిగి ఉన్న దిల్ రాజు, సునీల్ నారంగ్ లు పంపిణి చేస్తున్నారు. ఈ క్రమంలో థియేటర్స్, కలెక్షన్స్ ల విషయంలో ఇబ్బందులుంటాయని టక్ జగదీష్ నిర్మాతలు ఒక అడుగు వెనకేయబోతున్నట్లుగా సమాచారం. లవ్ స్టోరీ విడుదలయిన వారం తర్వాత ఏప్రిల్ 23న ప్రేక్షకుల ముందుకి వస్తారట. దీనికి సంబంధించిన అధికారక ప్రకటన అతి త్వరలోనే ప్రకటిస్తారట.