Balakrishna : నందమూరి బాలకృష్ణ.. సినిమాలతోనే కాదు, తన స్టైల్, అటిట్యూడ్‌తో కూడా ఎప్పటికప్పుడు వార్తల్లో నిలిచే వ్యక్తి. తాజాగా మరోసారి వార్తల్లోకి ఎక్కారు. హిందూపురం ఎమ్మెల్యేగా ప్రజలకు సేవ చేస్తూనే, తన వ్యక్తిగత అభిరుచుల్లోనూ ప్రత్యేకత చూపించే బాలయ్య, ఈసారి తన కొత్త బీఎండబ్ల్యూ వాహనం కోసం ప్రత్యేకమైన ఫ్యాన్సీ నంబర్‌ను ఎంపిక చేసుకున్నారు.
ఖైరతాబాద్ ఆర్టీఏ కార్యాలయంలో నిర్వహించిన ఫ్యాన్సీ నంబర్ల వేలంలో బాలకృష్ణ టీజీ09ఎఫ్0001 నంబర్‌ను సొంతం చేసుకున్నారు. ఇందుకోసం ఆయన ఏకంగా రూ.7.75 లక్షలు చెల్లించారు. ఈ నంబర్ బాలయ్య స్టేటస్‌కు సరిపోయేలా ఉండటమే కాదు, రాజకీయంగా, ఫ్యాన్ ఫాలోయింగ్ పరంగా కూడా గుర్తింపు పొందేలా ఉంది. త్వరలోనే తన బీఎండబ్ల్యూ కారు రిజిస్ట్రేషన్‌కు ఈ నంబర్‌ను ఉపయోగించనున్నట్టు తెలుస్తోంది.
ఈ వేలంలో బాలయ్య మాత్రమే కాకుండా పలు ప్రముఖులు, సంస్థలు కూడా తమ తమ ఇష్టమైన నంబర్ల కోసం పోటీపడ్డారు. టీజీ09ఎఫ్0099 నంబర్‌ను కాన్కాప్ ఎలక్ట్రికల్స్ సంస్థ రూ.4,75,999కి దక్కించుకోగా, ఎఫ్0005 నంబర్‌ను జెట్టి ఇన్‌ఫ్రా ప్రాజెక్ట్స్ రూ.1,49,999కి కొనుగోలు చేసింది. ఎఫ్0007 నంబర్‌కు శ్రీనివాసనాయుడు రూ.1,37,779 ఖర్చు చేయగా, ఎఫ్0019 నంబర్‌ను నేత్రావతి బలగప్ప శివలిప్ప రూ.60,000కు సొంతం చేసుకున్నారు.
ఒక్క ఖైరతాబాద్ జోన్ నుంచే ఫ్యాన్సీ నంబర్ల వేలం ద్వారా రవాణాశాఖ రూ.37 లక్షలకు పైగా ఆదాయం సంపాదించింది. ఇది ప్రభుత్వం దృష్టిలో చిన్న విషయంలా కనిపించినా, ఆర్థికంగా మంచి ఆదాయంగా నిలుస్తోంది. ఫ్యాన్సీ నంబర్ల వెనక ఉన్న వ్యయపరమైన ప్రాధాన్యం, బాలకృష్ణ లాంటి సెలబ్రిటీల దానిపై ఉన్న ఆసక్తి మరింతగా ఆసక్తికరంగా మారాయి. మరి ఈ నంబర్‌తో బాలయ్య బీఎండబ్ల్యూ ఎప్పుడు రోడ్డెక్కుతుందో చూడాలి.
