నందమూరి బాలకృష్ణ, బోయపాటి శ్రీను కాంబినేషన్‌కి మంచి క్రేజ్‌ ఉంది. గతంలో వీరి కాంబోలో వచ్చిన ‘సింహా’, ‘లెజెండ్‌’ చిత్రాలు మంచి విజయాలు నమోదు చేసుకున్న విషయం తెలిసిందే. తాజాగా వీరి కాంబోలో రూపొందుతున్న సినిమాలో మరో కథానాయికను ఎంపిక చేశారు.
అఖిల్‌ సరసన ‘అఖిల్‌’ సినిమాలో నటించిన సాయేషా త్వరలోనే షూటింగ్‌లో పాల్గొనబోతోందని చిత్ర బృందం అధికారికంగా ప్రకటించింది. బాలయ్య, బోయపాటి శ్రీను కాంబోలో తెరకెక్కుతున్న యాక్షన్‌ ఎంటర్‌టైనర్‌లో తొలుత ప్రజ్ఞా మార్టిన్‌, పూర్ణను కథానాయికలుగా ఎంపిక చేశారు. అలాగే కొన్ని సన్నివేశాలను సైతం చిత్రీకరించారు.
అయితే బాలయ్య, ప్రజ్ఞా మార్టిన్‌ జోడీగా సరిగా నప్పలేదని భావించిన చిత్ర బృందం ఆమె స్థానంలో సాయేషాని ఎంపిక చేసినట్టు సమాచారం. ప్రస్తుతం హైదరాబాద్‌లో శరవేగంగా షూటింగ్‌ జరుపుకుంటున్న ఈ చిత్రాన్ని వచ్చే ఏడాది సమ్మర్‌ స్పెషల్‌గా రంగంలోకి దించేందుకు చిత్ర యూనిట్ సన్నాహాలు చేస్తోంది.
బాలయ్య బర్త్‌డే సందర్భంగా రిలీజ్‌ చేసిన బిబి3 రోరింగ్‌ టీజర్‌, అందులోని బాలయ్య డైలాగులు చెప్పిన తీరు అందరినీ ఫిదా చేసింది. గతంలో వీరి కాంబోలో వచ్చిన చిత్రాలు మంచి విజయాలు సాధించడంతో లేటెస్ట్‌ సినిమాపై అందరిలోనూ మంచి అంచనాలు ఉన్నాయి. ద్వారకా క్రియేషన్ పతాకంపై మిర్యాల రవీందర్‌రెడ్డి ఈ సినిమాని భారీ బడ్జెట్‌తో నిర్మిస్తున్నారు. సాయేషాను బాలయ్యే ఎంపిక చేశాడని యూనిట్ అంతా చెప్పుకుంటోంది.