తమిళ అగ్ర కథానాయకుడు శివ కార్తికేయన్‌, నటి సాయి పల్లవి ప్రధాన పాత్రల్లో నటించిన రీసెంట్‌ బ్లాక్‌ బస్టర్‌ ‘అమరన్‌’. ఇండియాస్‌ మోస్ట్‌ ఫియర్‌లెస్‌ అనే పుస్తకంలోని మేజర్‌ వరదరాజన్‌ కథ ఆధారంగా వచ్చిన ఈ సినిమాకు రాజ్‌కుమార్‌ పెరియస్వామి దర్శకత్వం వహించారు. దీపావళి కానుకగా అక్టోబర్‌ 31న ప్రేక్షకుల ముందుకు వచ్చిన ఈ చిత్రం బాక్సాఫీస్‌ వద్ద సూపర్‌ హిట్‌గా నిలిచిన విషయం తెలిసిందే. శివ కార్తికేయన్‌ కెరీర్‌లో బిగ్గెస్ట్‌ హిట్‌గా నిలవడమే కాకుండా రూ.300 కోట్లకు పైగా వసూళ్లను రాబట్టింది.
తాజాగా ఈ చిత్రానికి బాలీవుడ్‌ స్టార్‌ నటి జాన్వీకపూర్‌ రివ్యూ ఇచ్చారు. ఈ ఏడాది ‘అమరన్‌’ బెస్ట్‌ మూవీ అని పేర్కొన్నారు. ఈ మేరకు ఇన్‌స్టా వేదికగా తన అభిప్రాయాన్ని వ్యక్తం చేశారు. ‘అమరన్‌’ చిత్రాన్ని చూడటం కాస్త ఆలస్యమైనట్లు చెప్పుకొచ్చారు. ఈ చిత్రంలోని ప్రతీ సన్నివేశం తన హృదయాన్ని కదిలించిందని.. ఒక మంచి సినిమాతో ఈ ఏడాదిని ముగించినట్లు జాన్వీ తన స్టోరీస్‌లో రాసుకొచ్చింది. ప్రస్తుతం ఈ పోస్ట్‌ వైరల్‌ అవుతోంది