ఐపీఎల్ 2025 సీజన్‌ ప్లేఆఫ్స్ రేస్ ఉత్కంఠతలోకి దూసుకెళుతోంది. ఇప్పటికే మూడు జట్లు.. సన్‌రైజర్స్ హైదరాబాద్, రాజస్థాన్ రాయల్స్, చెన్నై సూపర్ కింగ్స్ టోర్నీ నుంచి నిష్క్రమించాయి. ఇప్పుడు మిగిలిన ఏడు జట్లు టాప్-4 బెర్త్ కోసం ఉక్కిరిబిక్కిరి అవుతున్నాయి. ఓ జట్టు విజయంతో ముందుకెళ్తుంటే, మరో జట్టు ఓటమితో వెనక్కి పడుతోంది. ప్లేఆఫ్స్ రేసు ఎవరిది అన్న ప్రశ్నకు స్పష్టత కోసం అభిమానులు వేచి చూస్తున్నారు.
ప్రస్తుతం రాయల్ ఛాలెంజర్స్ బెంగళూరు టేబుల్ టాపర్‌గా ఉంది. 11 మ్యాచ్‌ల్లో 16 పాయింట్లతో ఉన్న ఆర్‌సీబీ, మిగిలిన రెండు మ్యాచ్‌ల్లో ఒక్కదాన్ని గెలిస్తే కనీసం ప్లేఆఫ్స్ తలుపులు తట్టనుంది. నెట్ రన్‌రేట్ బలంగా ఉండటంతో రెండు మ్యాచ్ లు పోయినా టాప్-2లో చోటు దక్కే అవకాశాలు ఎక్కువే. ఇక పంజాబ్ కింగ్స్ 11 మ్యాచ్‌ల్లో 15 పాయింట్లతో రెండో స్థానంలో ఉంది. మిగిలిన మూడు మ్యాచుల్లో కనీసం రెండు విజయాలతో ప్లేఆఫ్స్ తేల్చవచ్చు.
ముంబై ఇండియన్స్ ఐదు వరుస విజయాలతో తిరిగి రేసులోకి వచ్చింది. 11 మ్యాచ్‌ల్లో 14 పాయింట్లతో నిలిచిన ముంబైకి, మిగిలిన రెండు గేమ్స్ విన్నింగ్ వేలో ఉంటే టాప్-4 దక్కడం ఖాయం. అదే పరిస్థితి గుజరాత్ టైటాన్స్‌కు కూడా ఉంది. 10 మ్యాచ్‌ల్లో 14 పాయింట్లు ఉన్న గుజరాత్, మిగిలిన నాలుగు గేమ్స్‌లో కనీసం రెండు గెలవాల్సి ఉంది. శుభ్‌మన్ గిల్ సారథ్యంలోని ఈ జట్టు బ్యాలెన్స్ మెరుగ్గా కనిపిస్తోంది.
లక్నో, కోల్‌కతా, డెల్లీ జట్లకు ప్లేఆఫ్స్ ఆశలు ఉండాలంటే, కేవలం గెలవడమే కాదు… ఇతర జట్ల ఓటములను కూడా ఆశించాల్సిందే. లక్నోకు 11 మ్యాచ్‌ల్లో 10 పాయింట్లు మాత్రమే ఉన్నాయి. మిగతా మూడు గేమ్స్‌లో విజయం తప్పనిసరి. డెల్లీ, కోల్‌కతా జట్ల పరిస్థితి మరింత క్లిష్టం. ఒకవేళ ఈ జట్లలో ఏదైనా ప్లేఆఫ్స్ చేరినా అది భారీ సంచలనమే అవుతుంది. మొత్తం మీద ఈ సీజన్‌లో చివరి వరకూ ఆసక్తికరమైన పోటీ కొనసాగనుంది.
