పాకిస్తాన్ సూపర్ లీగ్ (పీఎస్ఎల్) 10వ సీజన్ ఈ నెల 11 నుంచి సందడిగా సాగుతోంది. అయితే ఆట కన్నా ఈ సీజన్‌లో అవార్డుల విషయంలోనే ఎక్కువ చర్చ జరుగుతోంది. తాజాగా కరాచీ కింగ్స్ జట్టు తమ స్టార్ బ్యాటర్ జేమ్స్ విన్స్‌కు ఓ ఆసక్తికర బహుమతి ఇచ్చింది. ఆయన 101 పరుగులు చేసిన ఇన్నింగ్స్‌కు గుర్తుగా జట్టు మేనేజ్‌మెంట్… హెయిర్ డ్రయ్యర్‌ను గిఫ్ట్‌గా ఇచ్చింది!
ఇందుకు సంబంధించిన వీడియోను వారు సోషల్ మీడియాలో షేర్ చేయడంతో నెటిజన్లు తెగ ట్రోల్ చేయడం మొదలుపెట్టారు. “తర్వాతి మ్యాచ్‌కు షాంపూ, టవల్ ఇవ్వొచ్చేమో”, “వెళ్లే ముందు షేవింగ్ క్రీమ్ కూడా తీసుకెళ్లండి” అనే కామెంట్లు వైరల్‌గా మారాయి. సాధారణంగా ప్లేయర్లకు ట్రోఫీలు, క్యాష్ ప్రైజులు ఇవ్వడం చూసిన క్రీడాభిమానులకు ఈ గిఫ్ట్ మాత్రం ఆశ్చర్యంగా, ఆపై హాస్యంగా కూడా అనిపించింది.
ఇంతకుముందు పీఎస్ఎల్ మ్యాచ్‌లో స్టేడియంలో “లక్కీ గిఫ్ట్” పేరిట ఓ బైక్‌ను స్టేజ్‌పై పెట్టిన నిర్వాహకులపై కూడా ట్రోల్స్ మొదలయ్యాయి. “ఈసారి బైక్.. వచ్చే ఏడాది సైకిల్ పెట్టేలా ఉందే!” అంటూ ఫన్నీ మీమ్స్ సోషల్ మీడియాలో చక్కర్లు కొడుతున్నాయి. కొన్ని మిమ్స్‌లో ఆటగాళ్ల చేతిలో బదులు కాఫీ మగ్స్, కాంబ్స్, టిఫిన్ బాక్స్‌లు చూపిస్తూ వినూత్న సెటైర్లు కూడా పెట్టారు.
ఇక ఆటతీరులో మాత్రం పీఎస్ఎల్ జట్లు పోటాపోటీగా పోటీ పడుతున్నా, ఈ తరహా బహుమతుల వల్ల లీగ్ సీరియస్‌నెస్ మీదే ప్రశ్నలు తలెత్తుతున్నాయి. కానీ మరోవైపు పీఎస్ఎల్ మ్యానేజ్‌మెంట్ మాత్రం సోషల్ మీడియా ట్రెండ్స్‌కు తగ్గట్టే ఫన్నీ ఎలిమెంట్లతో ఆకట్టుకోవాలని చూస్తుందన్న అభిప్రాయాలూ వినిపిస్తున్నాయి. ఏదేమైనా… హెయిర్ డ్రయ్యర్ అవార్డ్ మాత్రం పీఎస్ఎల్‌కి ట్రోల్ ట్రోఫీ గ్యారంటీగా తీసుకొచ్చింది!
