దక్షిణాఫ్రికా పేస్ స్టార్ కగిసో రబాడా పేరు ఇటీవల డోపింగ్ వివాదంతో వార్తల్లో నిలిచింది. అయితే, పోటీ సమయానికి సంబంధించినది కాదన్న కారణంతో అతనికి తాత్కాలిక నిషేధంతో సరిపెట్టారు. ఇది క్రికెట్ అభిమానుల్లో ఊరట కలిగించిన పరిణామంగా భావించవచ్చు.
SA20 లీగ్ సందర్భంగా తీసిన మూత్ర నమూనాలో ‘బెంజోయ్లెక్గోనైన్’ అనే మాదక ద్రవ్యపు చిహ్నాలు కనుగొనగా, అది కొకైన్ వాడకం ఆనవాళ్లుగా తేలింది. కానీ రబాడా న్యాయవాదులు వాదించిన వివరాల మేరకు ఇది పోటీకి సంబంధించని సమయంలో తీసుకున్నట్లు అధికారులు నిర్ధారించారు. దాంతో శిక్షను తగ్గించారు.
రబాడా తన తప్పును అంగీకరించి, పశ్చాత్తాపం వ్యక్తం చేశాడు. అంతేకాకుండా డ్రగ్ అవగాహన కార్యక్రమాన్ని పూర్తి చేశాడు. దీనిని దక్షిణాఫ్రికా డ్రగ్-ఫ్రీ స్పోర్ట్ సంస్థ ధృవీకరించింది. రబాడా “క్రికెట్కి నా జీవితం అంకితం. నా కారణంగా ఎవరికైనా బాధ కలిగితే, హృదయపూర్వకంగా క్షమించండి” అని స్పందించాడు.
ఈ పరిణామాల నేపథ్యంలో రబాడా మళ్లీ జట్టులోకి వచ్చేందుకు మార్గం సులభమైంది. ముఖ్యంగా జూన్ 11న లార్డ్స్ వేదికగా జరగనున్న ప్రపంచ టెస్ట్ ఛాంపియన్షిప్ ఫైనల్కు అతని లభ్యత కీలకం కానుంది. ప్రస్తుతం దక్షిణాఫ్రికా జట్టులో అతనిలాంటి సీనియర్ పేసర్ అవసరమవుతోంది.
సుమారు 70 టెస్టుల్లో 327 వికెట్లు తీసిన రబాడా, అత్యుత్తమ ఫామ్లో ఉన్న సమయంలో ఇలా తగిలిన వివాదం పట్ల అభిమానులు నిరాశ చెందారు. కానీ ఇప్పుడు అతని క్లాస్ మళ్లీ టెస్ట్ మ్యాచ్ వేదికపై మెరుస్తుందా? అన్నది ఆసక్తికరంగా మారింది.
