ఫలానా హీరోను దృష్టిలో పెట్టుకుని దర్శక, రచయితలు కథను రెడీ చేసుకోగా పలు కారణాల వల్ల అందులో వేరే హీరో నటించడం చిత్ర పరిశ్రమలో అప్పుడప్పుడూ జరుగుతుంటుంది. ఇలా వచ్చిన కొన్ని సినిమాలు ఊహించని విజయం అందుకున్నాయి, మరికొన్ని పరాజయం పొందాయి. ఈ జాబితాలో నిలిచిన ఓ హిట్‌ చిత్రం గురించి ఆసక్తికర విషయం తెలుసుకుందాం. ఆ మూవీ మరేదో కాదు ‘ఆనంద్‌: మంచి కాఫీలాంటి సినిమా .
చదువు పూర్తి కాగానే అమెరికా వెళ్లిన శేఖర్‌ కమ్ముల సినిమాపై ఆసక్తితో ఉద్యోగానికి రాజీనామా చేసి, ఫిల్మ్‌ మేకింగ్‌ కోర్సులో చేరిన సంగతి తెలిసిందే. తన అనుభవాన్ని రంగరించి రాసుకున్న తొలి స్క్రిప్టు ‘డాలర్‌ డ్రీమ్స్‌’. తెలుగు, ఇంగ్లిష్‌లో రూపొందిన ఆ సినిమా కమర్షియల్‌గా హిట్‌ కాలేదుగానీ ‘బెస్ట్‌ డెబ్యూ డైరెక్టర్‌’గా శేఖర్‌కు జాతీయ అవార్డు అందించింది. వసూళ్లపరంగాను విజయం సొంతం చేసుకోవాలనే కసితో తదుపరి ప్రయత్నంగా ‘ఆనంద్‌’ స్టోరీని రాసుకున్నారు.
పవన్‌ కల్యాణ్‌ ను దృష్టిలో పెట్టుకునే ఈ కథను సిద్ధం చేశానని, కానీ ఆయన్ను సంప్రదించలేదని శేఖర్‌ ఓ సందర్భంలో తెలిపారు. ఎందుకు విూట్‌ అవలేదనే విషయాన్ని ప్రస్తావించలేదు. అలా పవన్‌ను ఊహించుకుని రాసుకున్న ఆ స్టోరీలో.. అప్పటికి మూడు సినిమాల అనుభవం ఉన్న రాజా ‘ఆనంద్‌’గా నటించి మంచి క్రేజ్‌ తెచ్చుకున్నారు.
హీరోయిన్‌గా ముందుగా అసిన్‌, సదాను అనుకున్నా చివరకు ఆ అవకాశం కమలినీ ముఖర్జీకి దక్కింది. చిరంజీవి నటించిన ‘శంకర్‌దాదా ఎంబీబీఎస్‌’ రిలీజ్‌ డేట్‌నే ‘ఆనంద్‌’ టీమ్‌ కూడా ఫిక్స్‌ చేసుకోవడం అప్పట్లో హాట్‌ టాపిక్‌. 2004 అక్టోబరు 15న బాక్సాఫీసు ముందుకొచ్చిన ఈ రెండు చిత్రాలు మంచి విజయాన్ని అందుకున్నాయి. మరోవైపు, పవన్‌పై ఉన్న అభిమానంతో ఆయనతో సినిమా చేసేందుకు శేఖర్‌ ఆసక్తి చూపిస్తున్నారని, ‘లీడర్‌ 2’ను పవన్‌ హీరోగా తెరకెక్కించే ఆలోచనలో ఉన్నారంటూ గతంలో జోరుగా ప్రచారం సాగింది.