సుభిషి ఎంటర్‌టైన్‌మెంట్‌ పై వేణుగోపాల్‌ రెడ్డి నిర్మిస్తున్న సినిమా ‘లగ్గం’. ‘భీమదేవరపల్లి బ్రాంచి’ సినిమాతో దర్శకుడిగా మంచి గుర్తింపు తెచ్చుకున్న రమేష్‌ చెప్పాలఈ సినిమాకు రచన, దర్శకత్వం వహిస్తున్నారు. సాయి రోనాక్‌, ప్రగ్యా నగ్రా జంటగా నటిస్తున్న ఈ సినిమాలో రాజేందప్రసాద్‌, రోహిణి, ఎల్‌.బి శ్రీరామ్‌, సప్తగిరి ప్రధాన పాత్రల్లో నటిస్తున్నారు. ఈ చిత్రానికి కాసర్ల శ్యామ్‌ సాహిత్యం, చరణ్‌ అర్జున్‌ సంగీతం అందిస్తున్నారు.
మన తెలుగు సంప్రదాయంలోని తెలంగాణ పెళ్లినీ కన్నుల విందుగా చూపించ బోతున్నామని, ప్రతి ఒక్కరు ఈ చిత్రం గురించి మాట్లాడుకుంటారని, కళ్ళ ముందు కొత్త ఎక్స్పీరియన్స్‌ ను ఉంచే ఈ సినిమా.. కొన్ని తరాలు గుర్తుంచుకునే చిత్రం అవుతుందని…’ అని దర్శకుడు రమేష్‌ చెప్పాల, నిర్మాత వేణుగోపాల్‌ రెడ్డి పేర్కొన్నారు.
ఈ సందర్భంగా నటుడు డాక్టర్‌ రాజేందప్రసాద్‌ మాట్లాడుతూ.. ‘ఇది వరకు తెలుగు సాంప్రదాయంలో జరిగే పెళ్లి కాన్సెప్ట్‌ తో చాలా చిత్రాలు వచ్చాయని, అందుకు భిన్నంగా ఈ ‘లగ్గం’ సినిమా ఉండ బోతోందని… తెలంగాణతనం ఉట్టిపడే విధంగా దర్శకుడు రమేష్‌ ఈ సినిమాను తేరకెక్కిస్తున్నాడని’ అన్నారు. అన్ని రకాల హంగులతో దర్శకుడు ‘లగ్గం’ యూనివర్స్‌ ను క్రియేట్‌ చేయబోతున్నాడని నటి రోహిణి తెలిపింది.