జూనియర్ ఎన్‌టి‌ఆర్ తాజాగా సంచలన నిర్ణయం తీసుకున్నాడు. ఈ మధ్య కొంత మంది సోషల్ మీడియాలో సినిమా వాళ్ళ పేర్లతో నకిలీ అకౌంట్స్ క్రియేట్ చేసి ఆన్ లైన్ మోసాలకి పాల్పడుతున్నారు. ఆ మధ్య విజయ్ దేవరకొండ పేరు మీద కూడా ఇలానే ఫేక్ అకౌంట్ క్రియేట్ చేసి మోసాలకి పాల్పడ్డారు. అంతేకాదు ప్రముఖ నిర్మాణ సంస్థల పేర్ల మీద కూడా ఫేక్ అకౌంట్స్ క్రియేట్ చేసి ఆడిషన్స్ నిర్వహించబోతున్నట్టు న్యూస్ క్రియేట్ చేసి అమ్మాయిలని ట్రాప్ చేశారు. ఈ విషయంలో అప్రమత్తమైన నిర్మాణ సంస్థ సైబర్ క్రైం కి కంప్లైంట్ చేసి జాగ్రత్తలు చేపట్టారు.
కాగా ఇప్పుడు ఈ విషయంలో జూనియర్ ఎన్‌టి‌ఆర్ కూడా తనవంతు బాధ్యతలను నిర్వర్తించేందుకు ముందుకు వచ్చాడు. ఈ మధ్య కాలంలో పెరిగిపోతున్న ఆన్ లైన్ మోసాలకు చెక్ చెప్పేందుకు.. ప్రజల్లో అవగాహన పెంచేందుకు వీలుగా కొత్త బాధ్యతకు శ్రీకారం చుడుతూ తెలంగాణ పోలీసులకు ప్రచార కర్తగా వ్యవహరించనున్నాడు తారక్. ఫేస్ బుక్ లో ఫ్రెండ్ రిక్వెస్ట్ పెట్టి అమ్మాయిల్ని మాయ చేసి.. ఫోన్ నెంబర్లు తీసుకొని వేధించే వారికి చెక్ పెట్టేలా.. అలాంటి వారి దుర్మార్గాలపై అమ్మాయిల్లో అవగాహన పెంచేందుకు వీలుగా తారక్ ప్రచారం చేయబోతున్నాడు.
తాజాగా ఇందుకు సంబంధించిన ఒక వీడియోను షేర్ చేశారు. ‘ఫోన్ నెంబరు తీసుకుంటారు. ప్రేమ పేరుతో వల వేస్తారు. అభ్యంతరకర ఫోటోలు వాట్సాప్ లలో తెప్పించుకొని బ్లాక్ మొయిల్ కు పాల్పడుతున్నారు. ఇలాంటి ముఠాల విషయంలో అప్రమత్తంగా ఉండాలి’ అంటూ తెలంగాణ పోలీసులు రూపొందించిన వీడియోను జూనియర్ ప్రమోట్ చేశారు. ప్రస్తుతం ఈ వీడియో సోషల్ మీడియాలో వైరల్ అవుతోంది. కాగా ఎన్‌టి‌ఆర్ ప్రస్తుతం దర్శక ధీరుడు ఎస్ ఎస్ రాజమౌళి తెరకెక్కిస్తున్న ఆర్ ఆర్ ఆర్ లో కొమరం భీం గా నటిస్తున్నాడు. ఈ సినిమా తర్వాత త్రివిక్రం శ్రీనివాస్ తో ఒక సినిమా చేయబోతున్నాడు. ఈ సినిమా మార్చ్ నుంచి సెట్స్ మీదకి వెళ్ళబోతోంది.