YS Jagan: ఏబీఎన్-ఆంధ్రజ్యోతి ఎండీ వేమూరి రాధాకృష్ణపై వైసీపీ అధినేత, మాజీ ముఖ్యమంత్రి వైఎస్ జగన్ మోహన్ రెడ్డి సోషల్ మీడియా వేదికగా విరుచుకుపడ్డారు. వైసీపీ నాయకుల భార్యలను ఉద్దేశించి రాధాకృష్ణ చేసిన వ్యాఖ్యలు అత్యంత జుగుప్సాకరంగా, దిగజారిన భాషతో ఉన్నాయని ఆయన తీవ్రంగా ఖండించారు. ఇది కేవలం రాజకీయ విమర్శ కాదని, మహిళల ఆత్మగౌరవంపై జరిగిన దాడి అని జగన్ పేర్కొన్నారు.
“రేపు జగన్ మీ భార్యలను మీ భార్యలు కాదని చెబితే, వారిని అక్కచెల్లెళ్లుగా భావించి పెళ్లి సంబంధాలు చూసే స్థాయికి వైసీపీ నేతలు దిగజారిపోయారు” అంటూ రాధాకృష్ణ చేసిన వ్యాఖ్యలను జగన్ తన పోస్టులో ఉటంకించారు.
“రాజకీయ చర్చల్లోకి మహిళలను లాగడం, వారిని అవమానపరిచేలా మాట్లాడటం రాధాకృష్ణ అనుసరిస్తున్న విషపూరిత జర్నలిజానికి నిదర్శనం. ఇలాంటి అసహ్యకరమైన భాషను ఉపయోగించడం ద్వారా ఆయన మహిళా లోకాన్ని కించపరిచారు” అని జగన్ మండిపడ్డారు.
ప్రస్తుతం ప్రజల్లో చర్చనీయాంశమైన ‘మావిగన్ (MAVIGUN)’ ప్రతిపాదనను రాజకీయంగా ఎదుర్కోలేకనే, చంద్రబాబు మరియు ఆయన అనుకూల మీడియా ఇలాంటి దిగజారుడు విమర్శలకు దిగుతున్నారని జగన్ ఆరోపించారు. ప్రజల దృష్టిని మళ్లించేందుకే ఉద్దేశపూర్వకంగా మహిళలపై ఇటువంటి వ్యాఖ్యలు చేస్తున్నారని ఆయన విమర్శించారు.
రాధాకృష్ణ చేసిన ఈ వ్యాఖ్యలను ముఖ్యమంత్రి చంద్రబాబు, లోకేష్, పవన్ కళ్యాణ్ ఖండించకపోవడంపై జగన్ అభ్యంతరం వ్యక్తం చేశారు. “ఇంతటి జుగుప్సాకర వ్యాఖ్యలకు మద్దతు ఇవ్వడం ద్వారా మహిళల పట్ల వారికున్న ద్వేషభావం బయటపడింది. రాధాకృష్ణ వెంటనే క్షమాపణ చెప్పాలి మరియు ప్రభుత్వం ఆయనపై కఠిన చర్యలు తీసుకోవాలి” అని డిమాండ్ చేశారు.
తమ పార్టీ నాయకులు, కార్యకర్తలు ఇంతటి అవమానాన్ని ఎదుర్కొన్నప్పటికీ శాంతియుతంగా, ప్రజాస్వామ్యబద్ధంగా నిరసన తెలుపుతున్నారని, హింసకు తావు లేకుండా సంయమనం పాటిస్తున్నారని జగన్ స్పష్టం చేశారు.
