మొన్ననే తెలుగుదేశంపార్టీ వ్యవస్ధాపకుడు ఎన్టీయార్ బయోపిక్ టీజర్ విడుదలైన సంగతి అందరికీ తెలిసిందే. ఫంక్షన్ కు సినిమా ఫీల్డ్ లోని అతిరధ మహారథులందరూ హాజరయ్యారు. సినిమా తీస్తున్న బాలయ్యబాబును అందరూ బ్రహ్మాండంగా పొగిడారు. ఎన్టీయార్ కుటుంబమంతా హాజరై తమ అభిమానులను ఆలరించారు. అంత వరకూ బాగానే ఉంది కానీ ఇక్కడే ఓ ట్విస్టుంది. అంతమంది కుటుంబసభ్యులు హాజరైన ఫంక్షన్ కు చంద్రబాబునాయుడు, నారా లోకేష్ మాత్రం హాజరుకాలేదు. నారా బ్రాహ్మణి మాత్రం హజరైంది.
ఇంత అట్టహాసంగా జరిగిన ఫంక్షన్లో తండ్రి, కొడుకులు చంద్రబాబు, లోకేష్ హాజరు కాకపోవటం పెద్ద లోటుగానే భావించాలి. కుటుంబసభ్యులందరూ హాజరైన ఫంక్షన్ కు తండ్రి, కొడుకులు ఎందుకు హాజరుకాలేదు ? అన్నదే పెద్ద చర్చనీయాంశమైంది. నిజానికి వీరిద్దరు హాజరుకాలేనంత బిజీగా కూడా ఏమీ లేరు ఆరోజు. చంద్రబాబంటే ముఖ్యమంత్రి కాబట్టి ఏవో పనులున్నాయని అనుకున్నా లోకేష్ కు ఏమైంది ? ఎన్టీయార్ మనవడు, చంద్రబాబు వారసుడు, బాలయ్య కు పెద్దల్లుడు అయిన లోకేష్ రాకపోవటంపై పార్టీలోనే పెద్ద ఎత్తున చర్చ జరుగుతోంది.
ఆ ఫంక్షన్ కు అసలు రాడనుకున్నది జూనియర్ ఎన్టీయార్. ఎందుకంటే, బాబాయ్ కు అబ్బాయ్ కు ఏమాత్రం పడదన్న విషయం అందరికీ తెలిసిందే. అందుకే బాలకృష్ణకు సంబంధించిన ఏ ఫంక్షన్ లో కూడా జూనియర్ దాదాపు కనబడరు. ఈ ఫంక్షన్ కూడా బాలయ్యదే కాబట్టి జూనియర్ వస్తారని ఎవరూ అనుకోవలేదు. అయితే ఆశ్చర్యంగా జూనియర్ హాజరయ్యారు. కారణాలేవైనా బాలయ్యే జూనియర్ ను ఆహ్వానించినట్లు సమాచారం. ఇక్కడే అందరిలోను అనుమానాలు మొదలయ్యాయి. జూనియర్ హాజరవుతున్నారన్న విషయం తెలిసే లోకేష్ చివరి నిముషంలో ఫంక్షన్ కు రాలేదని అనుకుంటున్నారు.
నిజానికి చంద్రబాబు, లోకేష్ కు కూడా జూనియర్ తో ఏమంతా మంచి సంబంధాలు లేవు. కారణాలేవైనా తెలుగుదేశంపార్టీకి సంబంధించి తండ్రి, కొడుకులకు జూనియర్ అంటే ఏదో తెలీని భయం స్పష్టంగా కనబడుతోంది. దానికి కారణం లోకేష్ అసమర్ధతే అని ప్రత్యేకించి చెప్పక్కర్లేదు. జూనియర్-లోకేష్ ఇద్దరినీ పోల్చి చూసుకున్న వాళ్ళకు లోకేష్ పూర్తిగా తేలిపోతాడు. ఆ పరిస్ధితి రాకూడదనే బయోపిక్ ఫంక్షన్ కు లోకేష్ రాలేదని టిడిపి నేతలే అనుకుంటున్నారు.