Security Guard: భాగ్యనగరంలోని విలాసవంతమైన అపార్ట్మెంట్లలో నివసించే వారు ఏసీ గదుల్లో హాయిగా నిద్రిస్తుంటే, మనల్ని కాపాడే సెక్యూరిటీ గార్డుల పరిస్థితి ఎంత దయనీయంగా ఉంటుందో కళ్లకు కట్టే వీడియో ఒకటి ప్రస్తుతం సోషల్ మీడియాలో ప్రకంపనలు సృష్టిస్తోంది.
అసలేం జరిగింది? హైదరాబాద్కు చెందిన ఓ నివాస సముదాయంలో రాత్రి షిఫ్ట్లో పనిచేస్తున్న సెక్యూరిటీ గార్డ్, విపరీతమైన దోమల తాకిడిని తట్టుకోలేక తన కుర్చీ చుట్టూ దోమతెర కప్పుకుని విధుల్లో ఉన్నాడు. ఈ హృదయ విదారక దృశ్యాన్ని సూరజ్ కుమార్ బౌధ్ అనే వ్యక్తి తన మొబైల్లో బంధించి ‘ఎక్స్’ (ట్విట్టర్) వేదికగా షేర్ చేశారు.
“అపార్ట్మెంట్లోని నివాసితులు ఏసీ గదుల్లో హాయిగా నిద్రిస్తున్నారు. కానీ రాత్రంతా బయట ఉండి కాపలా కాసే ఈ గార్డులకు కనీసం సురక్షితమైన, సౌకర్యవంతమైన స్థలాన్ని ఎందుకు కల్పించలేరు? పేదల పట్ల ప్రజల్లో సానుభూతి తగ్గిపోవడమే దీనికి కారణం.” అని సూరజ్ తన పోస్టులో ఆవేదన వ్యక్తం చేశారు.
సామాజిక మాధ్యమాల్లో వెల్లువెత్తుతున్న ఆగ్రహం, ఈ వీడియో వైరల్ కావడంతో నెటిజన్లు సెక్యూరిటీ ఏజెన్సీలు మరియు అపార్ట్మెంట్ అసోసియేషన్ల తీరుపై తీవ్రంగా మండిపడుతున్నారు. ఈ పోస్ట్పై వస్తున్న కొన్ని ప్రధాన స్పందనలు.
“ఇది డ్యూటీ కాదు, ఆధునిక బానిసత్వం. కనీస సౌకర్యాలు లేకుండా పని చేయించుకోవడం నేరం” అని ఒక నెటిజన్ కామెంట్ చేశారు. “ఈ దృశ్యం నిజంగా హృదయాన్ని కలిచివేస్తోంది. రక్షణ ఇచ్చే వ్యక్తికే రక్షణ లేకపోవడం బాధాకరం” అని మరొకరు పేర్కొన్నారు. గార్డుల ఆరోగ్యం, భద్రత చూసుకోవాల్సిన బాధ్యత సొసైటీ యాజమాన్యానిదేనని, కనీసం ఆల్ అవుట్ లేదా కాయిల్స్ వంటి సౌకర్యాలు కూడా ఇవ్వకపోవడం దారుణమని పలువురు విమర్శిస్తున్నారు.
ఈ ఘటన కేవలం ఒక్క సెక్యూరిటీ గార్డుకు సంబంధించింది మాత్రమే కాదు. నగరం వెంబడి వేల సంఖ్యలో ఉన్న వాచ్మెన్లు, సెక్యూరిటీ సిబ్బంది ఇలాంటి కఠినమైన పరిస్థితుల్లోనే పనిచేస్తున్నారు. ఎండ, వాన, చలితో పాటు డెంగ్యూ, మలేరియా వంటి వ్యాధులు ప్రబలే దోమల మధ్య వారు ప్రాణాలకు తెగించి కాపలా కాస్తున్నారు.
కనీసం వారికి ఒక చిన్న క్యాబిన్, ఫ్యాన్ లేదా దోమల నుంచి రక్షణ కల్పించాల్సిన బాధ్యతను నివాసితులు, మేనేజ్మెంట్ కమిటీలు ఎప్పుడు గుర్తించుకుంటాయో వేచి చూడాలి.
