తెలంగాణ బీఆర్ఎస్ నేత కల్వకుంట్ల కవిత ఇటీవల చేసిన వ్యాఖ్యలు రాజకీయంగా వివాదాస్పదంగా మారాయి. ముఖ్యంగా జనసేన అధినేత, ఏపీ డిప్యూటీ సీఎం పవన్ కల్యాణ్పై చేసిన వ్యాఖ్యలతో సోషల్ మీడియాలో కవితపై ట్రోలింగ్ మొదలైంది. “అనుకోకుండా డిప్యూటీ సీఎం అయ్యారు.. సీరియస్ పొలిటీషియన్ కాదు” అనే కామెంట్ ఆమెకి వ్యతిరేకంగా మారింది. ప్రస్తుతం అధికారంలో ఉన్న జనసేన-టిడిపి కూటమికి పవన్ కీలక శక్తిగా ఉన్న సమయంలో ఆయనపై విమర్శలు చేయడం విమర్శకులకు టార్గెట్ అవుతోంది.
ఇప్పటికే లిక్కర్ స్కాంలో అరెస్ట్ అయి వచ్చిన తర్వాత రాజకీయంగా కాస్త మౌనంగా ఉన్న కవిత.. ఇప్పుడు హఠాత్తుగా మీడియా ముందుకు రావడం, ఇంటర్వ్యూలు ఇవ్వడం, వివాదాస్పద వ్యాఖ్యలు చేయడం వెనుక వ్యూహమే ఉందనే అభిప్రాయం ఉంది. చంద్రబాబు, లోకేశ్లను మెచ్చుకుని.. పవన్ను మినహాయించడం చూస్తే, ఆమె ఉద్దేశపూర్వకంగానే వివాదాలవైపు దృష్టి సారించారని అనిపిస్తోంది.
ఇదంతా తన రాజకీయ ఉనికిని నిలబెట్టుకోవడానికే జరగిందా అనే సందేహం కలుగుతోంది. కవిత వ్యాఖ్యలపై జనసైనికులు తీవ్రంగా స్పందిస్తూ ఆమెను సోషల్ మీడియాలో తీవ్రంగా ట్రోల్ చేస్తున్నారు. పవన్పై విమర్శలు చేసిన కవితను ‘పాపులారిటీ కోసం ప్రయత్నిస్తోందా?’ అంటూ ప్రశ్నిస్తున్నారు. ఎప్పుడూ పాలనలో తీరికలేక ప్రజల కోసం పనిచేస్తున్న పవన్ను “సీరియస్ పొలిటిషియన్ కాదు” అని తేల్చేయడం ఎంతవరకు సమంజసమన్నదే ఇప్పుడు చర్చకు వస్తోంది.
సంక్షిప్తంగా చెప్పాలంటే, ప్రస్తుతం రాజకీయంగా తక్కువ జోరులో ఉన్న కవిత.. మళ్లీ వేదికపైకి రావాలన్న ఉద్దేశంతోనే వివాదాస్పద వ్యాఖ్యలు చేసి ఉంటారని విశ్లేషకుల అభిప్రాయం. అయితే అది ఎలాంటి ఫలితాలిస్తుందనేది ముందు చూపుతో పరిగణనలోకి తీసుకోవాలి. ఎందుకంటే పవన్ జోలికి వెళితే.. తిరిగి తట్టుకోవడం తేలిక కాదు అని గత ఎన్నికలు చెప్పాయని ఫ్యాన్స్ కామెంట్ చేస్తున్నారు.