భారత యువ ఆటగాడు నితీశ్ కుమార్ రెడ్డి ఆస్ట్రేలియాలో జరిగిన మెల్బోర్న్ టెస్టులో అద్భుతమైన శతకంతో జట్టుకు గర్వకారణంగా నిలిచాడు. ఈ నేపథ్యంలో ఆంధ్రప్రదేశ్ డిప్యూటీ సీఎం పవన్ కల్యాణ్ నితీశ్ ప్రదర్శనపై తన అభినందనలు తెలియజేశారు. పవన్ తన సోషల్ మీడియా వేదికగా నితీశ్ ప్రతిభను పొగడ్తలతో ముంచెత్తారు.
“నువ్వు ఎక్కడ్నుంచి వచ్చావో కాదు, భారత్ కోసం ఏం చేశావో ముఖ్యం. నీ అద్భుత ప్రదర్శన భారత జాతీయ గర్వాన్ని మరింత పెంచింది. బోర్డర్-గవాస్కర్ ట్రోఫీలో భాగంగా ప్రతిష్ఠాత్మక మెల్బోర్న్ స్టేడియంలో సెంచరీ సాధించి చరిత్ర సృష్టించావు,” అని పవన్ పేర్కొన్నారు. యువ క్రికెటర్లకు నితీశ్ ప్రేరణగా నిలుస్తున్నాడని, తన ఆట తపన, పట్టుదలతో మరిన్ని రికార్డులు సాధించాలని ఆకాంక్షించారు.
మెల్బోర్న్ టెస్టు తొలి ఇన్నింగ్స్‌లో, భారత జట్టు కష్టాల్లో ఉన్న సమయంలో, నితీశ్ 189 బంతుల్లో 114 పరుగులు సాధించి జట్టును గౌరవప్రదమైన స్థితిలో నిలిపాడు. 11 ఫోర్లు, ఒక సిక్స్‌తో అలరించిన అతని ఇన్నింగ్స్ ఆఖరి వికెట్‌గా ముగిసింది. ఈ ప్రదర్శన టీమిండియా అభిమానులకు గర్వకారణంగా మారింది.
పవన్ కల్యాణ్ అభినందనలు సోషల్ మీడియాలో వైరల్ అవుతుండగా, నితీశ్ ప్రతిభపై ప్రశంసలు వెల్లువెత్తుతున్నాయి. యువ ఆటగాడు భారత క్రికెట్‌కు మరింత వెలుగు తేవాలని అంతా ఆకాంక్షిస్తున్నారు. పిన్న వయసులోనే తానేమిటో నిరూపించిన నితీశ్ విజయపథంలో ముందుకుసాగాలని క్రికెట్ విశ్లేషకులు అభిప్రాయపడుతున్నారు.