సినిమా నటుడు పద్మశ్రీ మోహన్ బాబు జగన్ పార్టీలో చేరి వచ్చే ఎన్నికల్లో పోటీ చేయబోతున్నాడా ? గత కొంత కాలంగా మోహన్ బాబు ఆంధ్ర ప్రదేశ్ ముఖ్య మంత్రి చంద్ర బాబును విమర్శిస్తున్నారు . వైఎస్సార్ పార్టీ నాయకుడు జగన్ మోహన్ రెడ్డిని ప్రశంసిస్తున్నారు . నిజానికి చంద్ర బాబు నాయుడు, మోహన్ బాబు ఇద్దరు చిత్తూర్ జిల్లాకు చెందిన వారు మాత్రమే కాదు , బంధువులు కూడా . ఎన్టీ రామా రావుకు మోహన్ బాబు అభిమాని . ఆయనతో మేజర్ చంద్ర కాంత్ అనే సినిమా కూడా తీశాడు . 1995లో రామారావు మోహన్ బాబుకు రాజ్య సభ సభ్యుడుగా ఎంపిక చేశాడు . అయితే రామారావు ను పార్టీ నుంచి చంద్ర బాబు నాయుడు దించేశాక మోహన్ బాబు చంద్ర బాబు వైపు వచ్చేశాడు . అప్పట్లో లక్ష్మి పార్వతి విశ్వాసం లేనివాడు అంటూ మోహన్ బాబును విమర్శించింది కూడా . అయితే కొన్నాళ్లకే మోహన్ బాబు చంద్ర బాబుకు చెడింది . ఎందుకు అనేది ఎవరికీ తెలియదు .
2003లో మోహన్ బాబు తన కుమారుడు విష్ణు ను హీరోగా పరిచయం చేసెటప్పుడు మాత్రం చంద్ర బాబు ఇంటికి వెళ్లి ఆహ్వానించాడు . చంద్ర బాబు అప్పుడు ముఖ్య మంత్రిగా వున్నాడు . 2009 లో మోహన్ బాబు తన కుమారుడు విష్ణు కు సిసి రెడ్డి మనవరాలు విరానికతో వివాహం జరిపించాడు . సిసి రెడ్డి కూతురును డాక్టర్ వైఎస్ రాజశేఖర్ రెడ్డి చిన్న తమ్ముడు సుధాకర్ రెడ్డి వివాహం చేసుకున్నాడు . ఈ రకంగా వైఎస్ కుటుంబంతో మోహన్ బాబుకు చుట్టరికం ఏర్పడింది . అప్పటి నుంచి చంద్ర బాబు కు మోహన్ బాబు మరింత దూరమయ్యాడు . వైఎస్ జగన్ కు దగ్గరయ్యాడు .
వైజాగ్ విమానాశ్రయంలో జగన్ మీద హత్యా ప్రయత్నం చేసిన విషయం తెలిసి ఆ చర్యను మోహన్ బాబు ప్రెస్ మీట్ పెట్టి మరీ ఖండించాడు . జగన్ త్వరగా కోలుకోవాలని చెప్పాడు . ఈరోజు మోహన్ బాబు జగన్ నివాసానికి వెళ్లి స్వయంగా పరామర్శించాడు . జగన్ కు సన్నిహితం అవుతున్న మోహన్ బాబు వచ్చే ఎన్నికల్లో తిరుపతి నుంచి పోటీ చేసే అవకాశాలు ఉన్నట్టు చెబుతున్నారు .
చంద్ర బాబు నాయుడు కూడా కుప్పం నియోజక వర్గాన్ని కుమారుడు లోకేష్ కి ఇచ్చి తాను తిరుపతి నుంచి పోటీ చేసే అవకాశం ఉందనే ఊహాగానాలు వినిపిస్తున్నాయి . చంద్ర బాబు మీద మోహన్ బాబు పోటీకి దిగుతాడా ? ఎం జరగ బోతున్నది ? అతి త్వరలోనే మోహన్ బాబు క్రియాశీలక రాజకీయాల్లోకి వచ్చే అవకాశం వుంది .