పల్నాడు జిల్లాలో ముస్లింలు చేపట్టిన శాంతియుత ర్యాలీకి హాజరైన మాజీ మంత్రి విడదల రజనికి ఊహించని చేదు అనుభవం ఎదురైంది. వక్ఫ్ సవరణ చట్టాన్ని వ్యతిరేకిస్తూ ఆదివారం చిలకలూరిపేటలో ముస్లింలు నిర్వహించిన ర్యాలీలో ఆమె హాజరైన సందర్భంలో అపశృతి చోటుచేసుకుంది. కళామందిర్ నుంచి ప్రారంభమైన ఈ ర్యాలీ చౌత్రా సెంటర్‌ వరకు సాగింది. ముస్లింలకు సంఘీభావంగా రజని కొంతదూరం ర్యాలీలో నడిచారు.
కానీ ఆమె హాజరుతో ర్యాలీకి రాజకీయ రంగు పడుతుందన్న ఆందోళన వ్యక్తం చేసిన కొంతమంది ముస్లింలు ఆమెను ఆపాలని పోలీసులను కోరారు. దీంతో పోలీసులు రజనిని ర్యాలీ నుంచి వెళ్లిపోవాలంటూ వినమ్రంగా కోరారు. ఈ విషయంపై అసంతృప్తి వ్యక్తం చేసిన రజని, “వక్ఫ్ చట్టంపై దేశవ్యాప్తంగా నిరసనలు జరుగుతున్నాయి. రాజకీయ నాయకులు కూడా వాటిలో పాల్గొంటున్నారు. మేము మద్దతుగా వచ్చాం, ఎందుకు అడ్డుకుంటున్నారు?” అంటూ పోలీసులతో వాగ్వాదానికి దిగారు.
అయినప్పటికీ పోలీసులు, నిర్వాహకుల అభ్యర్థన మేరకు రజని వెనుదిరిగారు. ర్యాలీ నిర్వాహకులు ఈ అంశంపై స్పందిస్తూ, “మేము పార్టీలకు అతీతంగా ముస్లింలంతా ఐక్యంగా ఈ ర్యాలీ నిర్వహిస్తున్నాం. ఇందులో ఏ పార్టీకి చెందినవారిని కలిపుకుంటే ర్యాలీ ఉద్దేశం దూరమవుతుంది” అని స్పష్టం చేశారు. రాజకీయ హస్తక్షేపం లేకుండా నిరసన కొనసాగాలని వారు అభిప్రాయపడ్డారు. మాజీ మంత్రి రజని అనంతరం విలేకరులతో మాట్లాడుతూ, “నేను ప్రజల సమస్యల పట్ల నా బాధ్యత నెరవేర్చడానికి వచ్చాను” అని తెలిపారు. మొత్తానికి ఈ ఘటన చిలకలూరిపేటలో రాజకీయాలు, ప్రజా ఉద్యమాల మధ్య జరిగిన వైవిధ్యమైన ఘట్టంగా నిలిచింది.
