సింహపురి నెల్లూరు జిల్లాలో శాంతిభద్రతల పరిస్థితిపై తీవ్ర ఆందోళన వ్యక్తమవుతోంది. అధికార పార్టీకి చెందిన ఇద్దరు మహిళా ఎమ్మెల్యేలకు వేర్వేరు ఘటనల్లో హత్య బెదిరింపులు రావడం జిల్లా వ్యాప్తంగా సంచలనం సృష్టిస్తోంది. కోవూరు ఎమ్మెల్యే వేమిరెడ్డి ప్రశాంతిరెడ్డికి డబ్బు ఇవ్వకపోతే చంపేస్తామని బెదిరింపు లేఖ రాగా, తన హత్యకు కుట్ర జరుగుతోందని కావలి ఎమ్మెల్యే కావ్య కృష్ణారెడ్డి ఆరోపించడం రాజకీయ వర్గాల్లో ప్రకంపనలు సృష్టిస్తోంది. అధికారంలో ఉన్న ప్రజాప్రతినిధులకే రక్షణ కరువైతే, సామాన్యుల పరిస్థితి ఏంటని సర్వత్రా ఆందోళన వ్యక్తమవుతోంది.
కోవూరు ఎమ్మెల్యేకి బెదిరింపు లేఖ.. కోవూరు ఎమ్మెల్యే వేమిరెడ్డి ప్రశాంతిరెడ్డికి రూ. 2 కోట్లు ఇవ్వాలని, లేకపోతే ప్రాణాలు తీస్తామని హెచ్చరిస్తూ ఆగస్టు 17న ఒక బెదిరింపు లేఖ వచ్చింది. ముఖానికి మాస్క్ ధరించిన గుర్తుతెలియని వ్యక్తి, నెల్లూరులోని ఎంపీ వేమిరెడ్డి ప్రభాకర్రెడ్డి నివాసానికి వచ్చి, అక్కడ భద్రతా సిబ్బందికి ఈ లేఖను అందజేసి వెళ్లిపోయాడు. లేఖను చూసి షాక్కి గురైన సిబ్బంది, వెంటనే ఎంపీ, ఎమ్మెల్యేలకు సమాచారం అందించి పోలీసులకు ఫిర్యాదు చేశారు.
ఈ వ్యవహారాన్ని గోప్యంగా ఉంచి దర్యాప్తు చేపట్టిన పోలీసులు, అల్లూరు మండలం ఇస్కపాళెంకు చెందిన ఒక వ్యక్తిని అనుమానితుడిగా గుర్తించి అదుపులోకి తీసుకున్నారు. అంతేకాకుండా, ఎమ్మెల్యే ఇంటి వద్ద అనుమానాస్పదంగా తిరుగుతున్న మరో యువకుడిని కూడా విచారిస్తున్నారు. అతని వద్ద నాలుగు మొబైల్స్ లభ్యం కావడంతో పోలీసులు దర్యాప్తును ముమ్మరం చేశారు. ఈ ఘటనపై జిల్లా ఎస్పీ కృష్ణకాంత్ స్పందిస్తూ, బెదిరింపు లేఖ వచ్చిన మాట వాస్తవమేనని, ప్రజలు భయపడాల్సిన అవసరం లేదని, త్వరలోనే పూర్తి వివరాలు వెల్లడిస్తామని తెలిపారు.
నా హత్యకు కుట్ర: కావలి ఎమ్మెల్యే
మరోవైపు, రెండు రోజుల క్రితం కావలి ఎమ్మెల్యే కావ్య కృష్ణారెడ్డి తన హత్యకు కుట్ర జరుగుతోందని సంచలన ఆరోపణలు చేశారు. తన క్వారీ సమీపంలో డ్రోన్ కెమెరాతో రెక్కీ నిర్వహించారని, అయితే తాను చివరి నిమిషంలో తన పర్యటనను అమరావతికి మార్చుకోవడం వల్ల పెను ప్రమాదం తప్పిందని పేర్కొన్నారు. ఈ ఘటనకు సంబంధించి ఇద్దరు యువకులను తన అనుచరులు పట్టుకొని పోలీసులకు అప్పగించారని తెలిపారు.
ఈ కుట్ర వెనుక మాజీ ఎమ్మెల్యే ప్రతాప్ కుమార్ రెడ్డి హస్తం ఉందని ఆమె నేరుగా ఆరోపించారు. తన వద్ద అందుకు సంబంధించిన పక్కా ఆధారాలు ఉన్నాయని, వాటిని త్వరలోనే బయటపెడతానని స్పష్టం చేశారు. ఈ రెండు ఘటనలతో నెల్లూరు జిల్లా రాజకీయాలు ఒక్కసారిగా వేడెక్కాయి. ఒకేసారి ఇద్దరు ఎమ్మెల్యేలు లక్ష్యంగా బెదిరింపులు రావడంపై పోలీసులు సమగ్ర దర్యాప్తు జరుపుతున్నారు.
