YS Sharmila On Dalit Christians: క్రైస్తవ మతంలోకి మారిన దళితులు తమ ఎస్సీ హోదాను కోల్పోతారంటూ సుప్రీంకోర్టు ఇటీవల వెలువరించిన తీర్పుపై ఏపీసీసీ అధ్యక్షురాలు వైఎస్ షర్మిల తీవ్రంగా స్పందించారు. ఈ నిర్ణయం అత్యంత బాధాకరమని, ఇది రాజ్యాంగ స్ఫూర్తికి విరుద్ధమని ఆమె అభిప్రాయపడ్డారు. ఈ అంశంపై నిర్వహించిన రౌండ్ టేబుల్ సమావేశంలో పాల్గొన్న వైఎస్ షర్మిల, దళిత క్రైస్తవుల హక్కుల కోసం పోరాడతామని స్పష్టం చేశారు.
సుప్రీంకోర్టు తీర్పు తొందరపాటు నిర్ణయంగా అనిపిస్తోందని వైఎస్ షర్మిల విమర్శించారు. తీర్పులో అణగారిన వర్గాలకు న్యాయం చేయాలనే తపన కంటే, 1950 నాటి ప్రెసిడెన్షియల్ ఆర్డర్ పేరాగ్రాఫ్ 3ని అమలు చేయాలనే ఉత్సాహమే ఎక్కువగా కనిపించిందని ఆమె ఎద్దేవా చేశారు. ఈ తీర్పు వల్ల ఆంధ్రప్రదేశ్లోనే దాదాపు 80 లక్షల మంది దళిత క్రైస్తవుల భవిష్యత్తు అగమ్యగోచరంగా మారిందని ఆవేదన వ్యక్తం చేశారు.
మతం మారితే స్థితిగతులు మారుతాయా? సమావేశంలో షర్మిల సంధించిన ప్రధాన ప్రశ్నలు ఇవే.
దళితులు మతం మారినంత మాత్రాన వారి ఆర్థిక పరిస్థితి మెరుగుపడదు, సమాజంలో వారిపై జరిగే దాడులు లేదా వివక్ష తగ్గడం లేదు. ఎస్టీలు, బీసీలు లేదా ఓసీలు మతం మారినప్పుడు వారి కుల హోదా మారనప్పుడు, కేవలం ఎస్సీల విషయంలోనే ఈ నిబంధన ఎందుకు? ఒకవైపు దళితుల రక్షణ కోసం చట్టాలు చేస్తూనే, మరోవైపు ఇలాంటి తీర్పులతో వారి హక్కులను లాగేసుకోవడం ఎంతవరకు సమంజసం?
దళిత క్రైస్తవులను ఎస్సీలుగానే పరిగణించాలని 2005లో రంగనాథ్ మిశ్రా కమిషన్ స్పష్టంగా చెప్పిందని షర్మిల గుర్తు చేశారు. కులానికి, మతానికి సంబంధం లేదని, మతం మారినా దళితుల సామాజిక స్థితి మారలేదని ఆ కమిషన్ పేర్కొన్న విషయాన్ని ఆమె నొక్కి చెప్పారు. 1950 ఆర్డర్లోని పేరాగ్రాఫ్ 3ని వెంటనే రద్దు చేయాలని డిమాండ్ చేశారు.
“2009లో అప్పటి ముఖ్యమంత్రి డాక్టర్ వైఎస్ రాజశేఖర్ రెడ్డి గారు దళిత క్రిస్టియన్లను ఎస్సీలుగా కొనసాగించాలని అసెంబ్లీలో తీర్మానం చేశారు. ఆయన బిడ్డగా దళిత క్రైస్తవుల పక్షాన నిలబడి పోరాటం చేస్తాను.” – ఏపీసీసీ చీఫ్ వైఎస్ షర్మిల
ఈ వివాదాస్పద తీర్పుపై కేంద్ర ప్రభుత్వం తక్షణమే స్పందించాలని, సుప్రీంకోర్టులో రీ-అప్పీల్కు (Re-appeal) వెళ్లాలని షర్మిల డిమాండ్ చేశారు. 1950 నాటి నిబంధనల్లో కేవలం హిందువులు, సిక్కులు, బౌద్ధులను మాత్రమే చేర్చి, దళిత క్రైస్తవులను మినహాయించడం అన్యాయమని ఆమె పేర్కొన్నారు.
