స్వర్గీయ ఎన్టీయార్ డీఎన్ఏ తెలుగుదేశం పార్టీలో లేకుండా చేయాలన్నది చంద్రబాబు ఆలోచన అంటూ టీడీపీ అధినేత మీద మాజీ మంత్రి, వైసీపీ నేత, గుడివాడ ఎమ్మెల్యే కొడాలి నాని తాజా ఆరోపణ. ఇక్కడ డీఎన్ఏ ప్రస్తావనలో అర్థమేమన్నా వుందా.?
నారా లోకేష్ది కూడా ఎన్టీయార్ డీఎన్ఏనే. ఎందుకంటే ఆయన స్వయానా ఎన్టీయార్ కుమార్తె భువనేశ్వరి తనయుడు. సాక్షాత్తూ ఎన్టీయార్ తనయుడు నందమూరి బాలకృష్ణ టీడీపీ ఎమ్మెల్యేగా వున్నారు. ఎన్టీయార్ డీఎన్ఏ గనుక టీడీపీలో వుండకూడదనుకుంటే, చంద్రబాబుకి అది సాధ్యమయ్యే పనే కాదు. ఆ విషయం కొడాలి నానికీ బాగా తెలుసు.
కేవలం యంగ్ టైగర్ ఎన్టీయార్ మాత్రమే స్వర్గీయ ఎన్టీయార్ డీఎన్ఏ అని కొడాలి నాని బలంగా నమ్ముతున్నారా.? అంటే, అదొక రాజకీయ యెత్తుగడ. చంద్రబాబునీ, నారా లోకేష్నీ విమర్శించడానికి ప్రతిసారీ ఏదో ఒక అంశం కొడాలి నానికి అవసరమవుతోంది.
మంత్రిగా వున్న సమయంలోనూ తన శాఖకు సంబంధించిన వ్యవహారాలేవీ కొడాలి నానికి పట్టలేదు. కేవలం బూతులకే పరిమితమయ్యారాయన అప్పట్లో. ఇప్పుడూ కొడాలి నాని చేస్తున్నది అదే. కొత్తగా ఈ డీఎన్ఏ వ్యవహారాలు తెరపైకి తీసుకురావడం వల్ల కొడాలి నాని, వైసీపీకి ఏమైనా రాజకీయంగా సాయం చేయగలుగుతున్నారా.? అంటే అదీ లేదు.
పైగా, కొడాలి నాని చేసే ప్రతి వ్యాఖ్య.. టీడీపీ మీద సింపతీకి కారణమవుతోంది. వైఎస్ జగన్ ఇలాంటి విషయాల్లో ఒకింత అప్రమత్తంగా వుండాలి. లేదంటే, కొడాలి నాని లాంటోళ్ళ వల్లనే పార్టీ భ్రష్టుపట్టిపోయే ప్రమాదముంది. ‘వైఎస్ జగన్ ప్రోత్సాహం లేకుండా కొడాలి నాని ఇలా వ్యవహరించలేరు’ అన్న సంకేతాలు జనంలోకి వెళితే అది వైసీపీ కొంప ముంచడం ఖాయం.