కేంద్రంలో నరేంద్ర మోడీ ప్రభుత్వం కొన్ని సంక్షేమ పథకాలు అమలు చేస్తోంది. రాష్ట్రంలో వైఎస్ జగన్ ప్రభుత్వం కొన్ని సంక్షేమ పథకాల్ని అమలు చేస్తోంది. ఎవరి దారి వారిదే. ఎవరి పబ్లిసిటీ పాట్లు వాళ్ళవి. వ్యాక్సినేషన్ సర్టిఫికెట్ మీద నరేంద్ర మోడీ ఫొటో ఎందుకు వుంది.? అన్నదానికి బీజేపీ సరైన సమాధానమిస్తే, వైఎస్ జగన్ పేరుతో సంక్షేమ పథకాలు నడవడంపై వైసీపీ కూడా సరైన సమాధానమే ఇస్తుందేమో.!
ఈ మధ్య ప్రధాని నరేంద్ర మోడీతో టీవీల్లో కొన్ని ప్రకటనలు దర్శనమిస్తున్నాయి. మోడీ ఇచ్చారు.. అంటూ ఆ ప్రకటనల్లో చెప్పిస్తున్నారు. మోడీ ఇవ్వడమేంటి.? ఆయన జేబుల్లోంచి ఏమన్నా తీసి ఇస్తున్నారా.? అన్న చర్చ తెరపైకొస్తోంది. అంతే కదా.! అదీ నిజమే కదా.? వైఎస్ జగన్ కూడా తన జేబుల్లోంచి రూపాయి కూడా తీసి సంక్షేమ పథకాలు అమలు చేయరు. కానీ, సంక్షేమ పథకాలకు తన పేరు పెట్టుకుంటారు
మోడీ పథకాల పేరు మర్చి వైఎస్ జగన్ ప్రభుత్వం సొంత పేర్లు పెట్టుకుంటోందన్నది బీజేపీ ఆరోపణ. అసలు ఈ పేర్ల పంచాయితీ ఏంటి.? కేంద్ర ప్రభుత్వం తమ చేతుల్లోనే వుంది కాబట్టి, దేశంలో ఏ సంక్షేమ పథకానికీ సొంత పేర్లు పెట్టకోకూడదన్న చట్టాన్ని ప్రధాని నరేంద్ర మోడీ నేతృత్వంలోని ఎన్డీయే ప్రభుత్వం తెచ్చేయొచ్చు కదా.?
బీజేపీ జాతీయ నాయకులు ఏపీలో ఈ మధ్య పర్యటించడం ఎక్కువైంది. అలా నాయకులు వస్తున్న ప్రతిసారీ, ‘స్టిక్కర్ సీఎం’ అంటూ వైఎస్ జగన్ మీద విమర్శలు చేస్తున్నారు. వైఎస్ జగన్ గనుక స్టిక్కర్ సీఎం అయితే, వ్యాక్సినేషన్ సర్టిఫికెట్లపై తన ఫొటోని స్టాంపుగా వేయించుకున్నందున ప్రధాని నరేంద్ర మోడీని స్టాంప్ పీఎం అనాలేమో.!
ఇది తెగే పంచాయితీ కాదు. ఎవరి గోల వారిది. అంతిమంగా ప్రజాధనంతోనే సంక్షేమ పథకాలు అమలు చేయాలి. అది ప్రజల సొమ్ము.. అదే ప్రభుత్వ ఖజానాలో వుంటుంది.. దానికి అధికారంలో వున్నోళ్ళు తాత్కాలిక ట్రస్టీలు మాత్రమే.!