ఆమధ్య అవిశ్వాస తీర్మానం సందర్భంగా పార్లమెంటులో నరేంద్రమోడి సమాధానం చెబుతూ చంద్రబాబునాయుడు వైసిపి అధ్యక్షుడు జగన్మోహన్ రెడ్డి ట్రాపులో పడ్డారని చెప్పారు. మోడి తన గురించి అలా చెప్పటంపై చంద్రబాబు ఇప్పటికీ గింజుకుంటునే ఉంటారు. మోడి చెప్పింది ఒకసారే అయినా చంద్రబాబు మాత్రం ఇప్పటికి ఓ వెయ్యిసార్లు గుర్తు చేసుకునుంటారు. మోడి అలా అప్పుడు ఎందుకు చెప్పారో తెలీదు కానీ చెప్పింది మాత్రం నిజమే అనిపిస్తోంది. గడచిన నెల రోజులుగా జగన్ ను చంద్రబాబు అనుకరిస్తునే ఉన్నారు. జగన్ ఇచ్చిన హమీలను అమలు చేయటంలో అయితేనేమి, ప్రత్యేకహోదా విషయమై నిరసన వ్యక్తం చేయటం, అసెంబ్లీకి నల్లచొక్కాలతో అసెంబ్లీకి హాజరవ్వటం అన్నీ చూస్తుంటే నిజంగానే చంద్రబాబు ట్రాపులో పడినట్లు రుజువవుతోంది.
పాదయాత్ర సందర్భంగా జగన్ అనేక హామీలను ఇచ్చారు. అందులో వృద్దులకు, వికలాంగులకు పెన్షన్లు రూ 2 వేలకు పెంచుతానన్నారు. డ్వాక్రా మహిళలకు రూ 10 వేలు ఇస్తానన్నారు. నిరుద్యోగ యువతకు రూ 2 వేలు భృతి ఇస్తానన్నారు. రైతులకు బీమా కల్పిస్తానని, రైతుభరోరసా క్రింద స్ధిరికీరణ నిధిని ఏర్పాటు చేస్తానన్నారు. ట్రాక్టర్లకు, ఆటోలకు రోడ్డు ట్యాక్స్ ఎత్తేస్తానని హామీ ఇచ్చారు. జగన్ ఇచ్చిన హామీలను చంద్రబాబు కాపీ కొట్టి తన పథకాలుగా ప్రచారం చేసుకుంటు అమల్లోకి తెస్తున్నారు.
అలాగే, పోరాటాలతోనే కేంద్ర ప్రభుత్వాన్ని దారిలోకి తెచ్చుకుని రాష్ట్రప్రయోజనాలు సాదించుకోవచ్చని జగన్ ఎప్పుడో చెప్పారు. ప్రత్యేకహోదా విషయంలో కేంద్రంపై అవిశ్వాస తీర్మానాన్ని ప్రవేశపెడతానన్నారు. కేంద్రంపై పోరాటం అవసరమే లేదని చంద్రబాబన్నారు. హోదా అవసరం లేదు ప్యాకేజీనే ముద్దన్నారు. తీరా చూస్తే మొదటి నుండి హోదాపై పోరాడుతున్నదే తానే అన్నంతగా బిల్డప్ ఇస్తున్నారు చంద్రబాబు. చివరకు జగన్ చెప్పిన అవిశ్వాస తీర్మానాన్ని సైతం కాపీకొట్టారు.
పోరాటాలు చేస్తేకానీ కేంద్రం దిగిరాదంటూ ధర్మపోరాటదీక్షలంటూ చంద్రబాబు డ్రామాలాడుతున్నారు. చివరకు ప్రత్యేకహోదా, రాష్ట్ర ప్రయోజనాల పేరుతో శుక్రవారం రాష్ట్ర బంద్ చేశారు. అంతేకాకుండా అసెంబ్లీకి నల్లచొక్కాలు వేసుకొచ్చారు. నిరసనగా చంద్రబాబు నల్లచొక్కాలు వేసుకోవటం బహుశా ఇదే మొదటిసారేమో. కేంద్రంపై పోరాటానికి వీలుగా అఖిలపక్ష సమావేశాలు నిర్వహించమని జగన్ ఎన్నోసార్లు డిమాండ్ చేసినా చంద్రబాబు పట్టించుకోలేదు. కానీ ఎన్టీఏలో నుండి బయటకు వచ్చేయగానే అఖిలపక్ష సమావేశాలంటూ నానా హడావుడి చేస్తున్నారు.
చివరకు ఢిల్లీలో దీక్షలని జగన్ అంటే అప్పట్లో ఎద్దేవా చేసిన ఇదే చంద్రబాబు ఈనెల 11వ తేదీన ఢిల్లీలో దీక్షకు దిగుతున్నారు. ఇదంతా చూస్తుంటే 40 ఏళ్ళ జగన్ ట్రాపులో 40 ఇయర్స్ ఇండస్ట్రీ చంద్రబాబు పడినట్లు అనిపించటం లేదా ?