Pawan Kalyan: ఆంధ్రప్రదేశ్ ఉప ముఖ్యమంత్రి పవన్ కల్యాణ్ మరియు ఆయన కుటుంబ సభ్యులపై వివాదాస్పద వ్యాఖ్యలు చేసిన కేసులో ప్రముఖ స్టాండప్ కమెడియన్ అనుదీప్ కటికలను ఏపీ పోలీసులు అరెస్ట్ చేశారు. ఉత్తరప్రదేశ్ రాష్ట్రంలోని ప్రయాగ్రాజ్లో తండ్రితో కలిసి పర్యటిస్తున్న అనుదీప్ను కాకినాడ జిల్లా పోలీసులు మంగళవారం రాత్రి అదుపులోకి తీసుకున్నారు.
హైదరాబాద్కు చెందిన అనుదీప్ కటికల ఇటీవల ఒక కామెడీ షోలో పవన్ కల్యాణ్ వ్యక్తిగత జీవితం, ఆయన వివాహాలు, అలాగే నటి నిహారిక కొణిదెల విడాకులపై వ్యంగ్యంగా వ్యాఖ్యలు చేశారు. ఈ వీడియో సోషల్ మీడియాలో వైరల్ కావడంతో జనసైనికులు, మెగా అభిమానుల నుంచి తీవ్ర వ్యతిరేకత వ్యక్తమైంది. దీనిపై జనసేన పార్టీ తూర్పుగోదావరి జిల్లా జాయింట్ సెక్రటరీ బడే వెంకట కృష్ణ కాకినాడ వన్ టౌన్ పోలీస్ స్టేషన్లో ఫిర్యాదు చేశారు.
ఫిర్యాదు మేరకు పోలీసులు అనుదీప్పై భారతీయ న్యాయ సంహిత (BNS) మరియు ఐటీ చట్టం కింద పలు సెక్షన్లను నమోదు చేశారు. సెక్షన్ 356(2) పరువు నష్టం, సెక్షన్ 353(2) తప్పుడు సమాచారాన్ని వ్యాప్తి చేయడం, వివిధ వర్గాల మధ్య వైషమ్యాలు పెంచేలా ప్రసంగించడం. సెక్షన్ 79 మహిళల గౌరవానికి భంగం కలిగించడం. ఐటీ యాక్ట్ సెక్షన్ 67 ఎలక్ట్రానిక్ రూపంలో అశ్లీల సమాచారాన్ని ప్రచురించడం.
అనుదీప్ కటికల క్షమాపణలు చెప్పినా తగ్గని వేడి
ఈ వివాదం ముదరడంతో అనుదీప్ ఇప్పటికే ఒక వీడియో సందేశం ద్వారా బహిరంగ క్షమాపణలు చెప్పారు. తన ఉద్దేశం ఎవరినీ కించపరచడం కాదని, సమాజంలో విడాకులపై ఉన్న ధోరణిని సరదాగా ప్రస్తావించడమేనని వివరణ ఇచ్చారు. అయినప్పటికీ, డెప్యూటీ సీఎం గౌరవానికి భంగం కలిగించేలా ఉన్నాయంటూ పోలీసులు చట్టపరమైన చర్యలకు ఉపక్రమించారు.
ప్రయాగ్రాజ్లో అదుపులోకి తీసుకున్న అనుదీప్ను పోలీసులు రైలు మార్గంలో కాకినాడకు తరలిస్తున్నారు. ఈ కేసులోని సెక్షన్లు చాలా వరకు బెయిలబుల్ కావడంతో, కాకినాడ చేరుకున్నాక నోటీసులు జారీ చేసి స్టేషన్ బెయిల్పై విడుదల చేసే అవకాశం ఉందని సమాచారం.
