‘ఎప్పుడు ఎన్నికలు వచ్చినా సిద్ధమే..’ అంటున్నారు తెలుగుదేశం పార్టీ అధినేత నారా చంద్రబాబునాయుడు. 2019 ఎన్నికల్లో టీడీపీ ఘోర పరాజయం తర్వాత, ఆ పార్టీ కోలుకోలేదు. నానాటికీ టీడీపీ పరిస్థితి అత్యంత పతనావస్థకు దిగజారిపోతూనే వుంది. కింద పడ్డా పై చేయి తనదే అన్నట్టు వ్యవహరించడం చంద్రబాబుకి కొత్తేమీ కాదు. పార్టీ సర్వనాశనమైపోయినా ఆయన మేకపోతు గాంభీర్యం మాత్రం మానడంలేదు.
‘వచ్చే ఎన్నికల్లో వైసీపీని ఓడిస్తాం..’ అంటున్నారు చంద్రబాబు. ఇదే మాట జనసేనాని కూడా చెబుతోంది. రాజకీయాల్లో ఈ మాత్రం కాన్ఫిడెన్స్ వుండాల్సిందే. కానీ, తెలుగుదేశం పార్టీ ప్రస్తుత పరిస్థితేంటి.? జనం టీడీపీని ఎలా ఇప్పుడు రిసీవ్ చేసుకుంటున్నారు.? అన్నది కూడా చంద్రబాబు ఆలోచించుకోవాలి కదా.?
నిజమే, చంద్రబాబు సభలకు జనం పోటెత్తుతున్నారు. ఇందుకోసం భారీగా టీడీపీ శ్రేణులు జన సమీకరణ చేయగలుగుతున్నాయి. ఆ విషయంలో టీడీపీ సక్సెస్ అవుతోంది. జనం వస్తే, పార్టీ బలపడినట్లేనా.? అన్నదీ ఆలోచించుకోవాల్సిన విషయమే. టీడీపీలో కీలక నేతలెవరు.? అని ఆరా తీస్తే ప్రస్తుతం, జనాన్ని పోగేసి.. పార్టీని గెలిపించగల దమ్మున్న నాయకులైతే టీడీపీలో కనిపించడంలేదు. పైగా, టీడీపీలో నారా లోకేష్ తీరు పట్ల ఇంకా కొందరు సీనియర్లు అసహనంతో వున్నారు.
జనసేన విషయానికొస్తే, టీడీపీ కంటే కొంత బెటర్ పొజిషన్లో జనసేన కనిపిస్తోంది. దానిక్కారణం 2019 ఎన్నికల్లో వచ్చిన ఫలితాలే. ఈసారి డజను సీట్లకు పైనే జనసేన గెలుచుకోవచ్చు.. అది ఆ పార్టీకి ఊరటనిచ్చే అంశమే. కాలం కలిసొస్తే, ఇంకో డజను సీట్లు జనసేనకు వచ్చినా వింతేమీ లేదు.టీడీపీ పరిస్థితి అది కాద. 2019 కంటే ఎక్కువ సీట్లొస్తే సరిపోదు. గెలిచి తీరాలి.. అధికార పీఠమెక్కాలి. కానీ, టీడీపీని గెలిపించేంత సమర్థత వున్న నాయకులు టీడీపీలో వున్నారా.? నిజానికి, అభ్యర్థులే సరిగ్గా దొరకని పరిస్థితి టీడీపీకి వుందట.