ఏపీలో పోలీసులు వినూత్న మార్గాలు ఎంచుకుంటున్నారు. ముఖ్యంగా డ్రోన్ కెమెరాల వినియోగంతో ఇప్పుడు సీక్రెట్‌గా జరిగే చట్టవిరుద్ధ కార్యకలాపాలను గుర్తించడం తేలికవుతోంది. తాజాగా కృష్ణా జిల్లాలో ఇలాంటి ఘటన హైలెట్ అయ్యింది. గుడివాడలోని ఓ ఇంజనీరింగ్ కాలేజ్ వెనుక భాగంలో బహిరంగ ప్రదేశంలో ఇద్దరు వ్యక్తులు మద్యం సేవిస్తుండగా డ్రోన్ కెమెరా వారిని పట్టేసింది. మద్యం తీసుకుంటూ రిలాక్స్ అవుతున్న వారిని డ్రోన్ కెమెరా తమ కెమెరాలో బంధించడంతో ఒక్కసారిగా వారిద్దరూ పరుగు పెట్టారు.
ఈ వీడియోను కృష్ణా జిల్లా పోలీసులు తమ అధికారిక ఖాతా ద్వారా షేర్ చేశారు. అయితే ఇది సోషల్ మీడియాలో బాగా వైరల్ కావడంతో టీడీపీ యువనేత నారా లోకేష్ స్పందిస్తూ ఆసక్తికరంగా ట్వీట్ చేశారు. “ఫీల్డ్‌లో రిలాక్స్ అవుతూ ఉన్నవాళ్లపై సానుభూతి కలుగుతోంది. కానీ, ఏమి చేయలేం.. ఏపీ పోలీస్ డ్రోన్లు తమ పని చేయాల్సిందే!” అంటూ చమత్కారంగా వ్యాఖ్యానించారు. లోకేష్ స్పందన ఫన్నీగా ఉండటంతో నెటిజన్ల నుంచి అదే స్థాయిలో స్పందన లభించింది.
ఈ వీడియోలో కనిపించిన సన్నివేశాన్ని చూస్తే.. ఇద్దరు వ్యక్తులు చెట్ల కింద కూర్చొని ఓ బాటిల్ నింపుకుని మెల్లగా మద్యం సేవిస్తూ ఉన్నారు. కానీ ఒక్కసారిగా డ్రోన్ ఆకాశంలో మెరిసి వారి దృష్టిలో పడిన వెంటనే వారు టెన్షన్ పడి పరుగులు పెట్టడం నవ్వు తెప్పిస్తోంది. పోలీసులు మాత్రం డ్రోన్ కెమెరాల సహాయంతో వీరిని గుర్తించి వెంటనే అదుపులోకి తీసుకున్నారు. వారిపై మద్యం సేవన నిబంధనలు ఉల్లంఘించినందుకు కేసు నమోదు చేశారు.
ఇలాంటి ఘటనలు గత కొన్ని రోజులుగా ఏపీలో వరుసగా నమోదవుతున్నాయి. పశ్చిమ గోదావరి జిల్లాలో పేకాట ఆడుతున్నవారిని, అనంతపురం జిల్లాలో అక్రమంగా మద్యం తయారీదారులను డ్రోన్ కెమెరాలతో పట్టుకున్న ఘటనలు ఇప్పటికే వార్తల్లో నిలిచాయి. ఇప్పుడు కృష్ణా జిల్లాలో కూడా ఇదే తంతు తిరిగింది. అయితే లోకేష్ ట్వీట్ చేసిన తీరుతో పోలీసులు డ్రోన్ టెక్నాలజీని ఎలా ప్రజల్ని కాపాడేందుకు వినియోగిస్తున్నారో హైలైట్ అయ్యింది. ఇది రాష్ట్రవ్యాప్తంగా ఒక విధంగా డ్రోన్ నిఘా వ్యవస్థపై విశ్వాసాన్ని పెంచేలా మారింది.
