కలియుగ దైవం శ్రీ వేంకటేశ్వరస్వామికి సేవ చేసుకునే మహా భాగ్యం దక్కినప్పుడు ఒళ్లు ఎంత దగ్గర పెట్టుకుని నడుచుకోవాలో ప్రత్యేకంగా చెప్పనవసరం లేదు. ఏమాత్రం తేడా వచ్చినా బ్రతుకు బొమ్మ కాస్తా బొరుసు అయిపోతుంది. గత ప్రభుత్వ హయాంలో సినీనటుడు పృథ్వీకి ఎలాంటి అనుభవం ఎదురైందనేది తెలిసిన విషయమే. ఆ సమయంలో.. ఆయనపై ఆరోపణలు రాగానే వైఎస్ జగన్ తక్షణ చర్యలు చేపట్టారు.. శభాష్ అనిపించుకున్నారు. అయితే ఇప్పుడు బీఆర్ నాయుడు విషయంలో ఆరోపణలు విత్ వీడియో వెలుగులోకి వచ్చినా.. కూటమి ప్రభుత్వం నుంచి చర్యలు కనిపించడం లేదు. ఈ సమయంలో ఎంపీ పుట్టా మహేష్ కుమార్ యాదవ్ పై డ్రగ్స్ ఆరోపణలు వచ్చినా, చర్యలకు ఉపక్రమించకపోవడంపై ఓ ఆసక్తికర చర్చ తెరపైకి వచ్చింది.
ఇటీవల టీటీడీ ఛైర్మన్ బీఆర్ నాయుడుకి సంబంధించిన కొన్ని వీడియోలు, మరికొన్ని ఫోటోలు తెరపైకి వచ్చి తీవ్ర కలకలం రేపిన సంగతి తెలిసిందే. శ్వాస శ్వాస తగిలే అంత దగ్గరగా, ఓ మహిళ నడుముపై చేయి వేసినట్లు కనిపిస్తున్న దృశ్యాలున్న వీడియో ఒకటి విపరీతంగా వైరల్ అయ్యింది. దీంతో.. ఒరిజినల్ హిందువులు తీవ్ర ఆందోళన వ్యక్తం చేశారు! ఇది ఏమాత్రం సహేతుకం కాదని, సమర్ధనీయం కాదని, ఆయన వెంటనే స్వచ్ఛందంగా తన పదవికి రాజీనామా చేయాలని.. పార్టీలకు అతీతంగా పలువురు డిమాండ్ చేశారు. మరోవైపు తాము సనాతనులమని చెప్పుకునేవారు ఈ విషయంపై స్పందించకుండా కలుగుల్లోకి వెళ్లిన పరిస్థితి! దీనిపైనా తీవ్ర విమర్శలు వెళ్లువెత్తాయి. ఇక సీఎం చంద్రబాబు అయితే కొండపై మీ జరగలేదు అన్నట్లుగా తనదైన శైలిలో లైట్ తీసుకున్నారు.. శ్రీవారి విషయంలో తమ చిత్తశుద్ధిని అలా చూపించారు!!
ఇక ఈ వ్యవహారం చినికి చినికి గాలివానగా మారడం.. టీటీడీ చైర్మన్ పై తీవ్ర స్థాయిలో విమర్శలు, రాజీనామా డిమాండ్లు రావడంతో.. బీఆర్ నాయుడు మైకుల ముందుకు వచ్చారు. తనకు, మరో మహిళకు సంబంధించిన వీడియోలను కొంతమంది కావాలనే ప్రసారం చేస్తున్నారని.. అందులో కొంత ఏఐ టెక్నాలజీ వాడారని ఆరోపిస్తూ… అసలు అందులో తనకు తప్పేమీ కనిపించలేదని సమర్ధించుకుంటూ… అందులో తప్పేముంది అని ఎదురు ప్రశ్నించిన పరిస్థితి. ఆ కుటుంబానికి, తమకు సుమారు 30 ఏళ్లకు పైగా అనుబంధం ఉందని.. వారింటికి తాను, తన ఇంటికి వారూ వస్తుంటారని.. ఇది నిన్నో మొన్నో మొదలైన బంధం కాదని.. సుమారు 30 ఏళ్ల అనుబంధమని తనదైన శైలిలో వెళ్లడించారు! దీంతో.. ట్రోలింగ్స్ మరింతగా పెరిగిపోయాయి!
ఇందులో భాగంగా… “కృష్ణ” సినిమాలో బాబీ పాత్రలో బ్రహ్మానందం చేసిన కామెడీ సన్నివేశాలు హల్ చల్ చేశాయి. “ఈ మధ్య మనం మరీ ఓవర్ అయిపోతున్నాం బాబీ అని ఆమె అంటే… తప్పేముందే, వయసులో ఉన్నవాళ్లు చేసే పనే కదా ఇది” అంటూ బ్రహ్మానందం ఇచ్చి ఎక్స్ ప్రెషన్స్ తో బీఆర్ నాయుడిని నెటిజన్లు ఓ ఆటాడేసుకున్నారు! “చాలా కాలం గుర్తుండే” ఈ వ్యవహారంపై కూటమి ప్రభుత్వం ఎలాంటి చర్యలూ చేపట్టకపోవడం మరింత విమర్శలను మూటగట్టుకుంది.
ఆ సంగతి అలా ఉంటే… మరోవైపు పుండు మీద కారం చల్లినట్లుగా ఆ సమస్యకు తోడు డ్రగ్స్ కేసులో టీటీడీ ఎంపీ పుట్టా మహేష్ కుమార్ యాదవ్ పట్టుబడటం.. అతనికి చేసిన పరీక్షల్లో పాజిటివ్ వచ్చిందని పోలీసు అధికారులు చెప్పడం తీవ్ర కలకలం రేపింది. దీంతో… చంద్రబాబుకు దెబ్బ మీద దెబ్బ తగిలినట్లయ్యిందనే కామెంట్లు వినిపించాయి. ఈ సమయంలో వార్నింగ్ లు, ఉపయోగంలేని రొటీన్ స్టేట్ మెంట్లతోనే చంద్రబాబు కాలం గడపాల్సిన పరిస్థితి ఎదురైంది. పుట్టా మహేష్ కుమార్ పై చర్యలు తీసుకోలేని పరిస్థితి అని అంటున్నారు పరిశీలకులు. అందుకు ప్రధాన కారణం బీఆర్ నాయుడి వ్యవహారంపై మౌనమే అని చెబుతున్నారు.
అంటే… పవిత్రమైన తిరుమల కొండపై వీడియోలతో సహా దొరికేసినప్పటికీ బీఆర్ నాయుడిపై చర్యలు తీసుకోలేదు కానీ… బీసీ సమాజిక వర్గానికి చెందిన పుట్టా మహేష్ కుమార్ పై మాత్రం చంద్రబాబు చర్యలు తీసుకున్నారని.. తన సామాజికవర్గానికి చెందిన వారికి ఒక రూలు, బీసీలకు మరో రూలు అన్నట్లుగా ఆయన ప్రవర్తించారనే విమర్శలు వస్తాయని చంద్రబాబు ఆలోచిస్తున్నారని.. ఆ కారణంతోనే పుట్టాకు డ్రగ్స్ టెస్టులో పాజిటివ్ వచ్చినా చర్యలు తీసుకోలేని అసమర్థ స్థితిలోకి నెట్టబడ్డారని పలువురు అభిప్రాయపడుతున్నారు. అలా అని తొలుత బీఆర్ నాయుడిపైనా చర్యలు తీసుకుందామంటే.. అంత సాహసం చంద్రబాబు చేయలేరని మరికొందరు అంటున్నారు.
అలా అని అధికారంలో ఉన్న పార్టీలోని నాయకులు ఏమి చేసినా అధినేతగా చంద్రబాబు ఇలానే మౌనంగా ఉండిపోతే… రబ్బరు స్టాంపుగా మిగిలిపోయే పరిస్థితి వచ్చి, క్రమశిక్షణ విషయంలో చాలా స్ట్రిక్ట్ గా ఉంటారంటూ ఇంతకాలం సంపాదించుకున్న పేరు పూర్తిగా పోయే ప్రమాదం లేకపోలేదనేది ఆయన అభిమానుల ఆందోళనగా ఉందని అంటున్నారు. ఏది ఏమైనా… ఈ విషయంలో మాత్రం ఎంపీ పుట్టాను, టీటీడీ ఛైర్మన్ బీఆర్ నాయుడు పరోక్షంగా కాపాడినట్లే అనేది ఏపీ పొలిటికల్ సర్కిల్స్ లోని తాజా చర్చ కాగా… ఈ పరిస్థితి మాత్రం చంద్రబాబును అటు కేడర్ లోనూ, ఇటు ప్రజల్లోనూ అసమర్థ అధినేతగా బలమైన అభిప్రాయం ఏర్పరచే ప్రమాదం లేకపోలేదనేది పరిశీలకుల మాటగా ఉంది!