‘నీకు దేవుడంటే నమ్మకం లేకపోతే అది నీ కర్మ’ అని హీరోయిన్ ఈషా రెబ్బా.. హీరో సుమంత్ తో కోపంగా అన్నారు. దానికి ‘దేవుడి మహిమా? లేక మానవ మేధస్సా? చూద్దాం’ అంటూ సమాధానమిస్తన్నారు సుమంత్. సుమంత్ హీరోగా నటిస్తున్న చిత్రం ‘సుబ్రహ్మణ్యపురం’. సంతోష్‌ జాగర్లపూడి దర్శకత్వం వహిస్తున్నారు. ఈషా రెబ్బా హీరోయిన్. శేఖర్‌ చంద్ర సంగీతం అందిస్తున్నారు. బి. సుధాకర రెడ్డి నిర్మిస్తున్నారు.
‘ఆ భగవంతుడు ఈ ఊరికి రక్షణగా ఒకడ్ని సిద్ధం చేసే ఉంచాడు’ అంటూ ఇటీవల విడుదలైన ఈ సినిమా టీజర్‌కు మంచి స్పందన లభించింది. తాజాగా ఈ చిత్రం ట్రైలర్‌ను విడుదల చేశారు. సుమంత్ సుబ్రహ్మణ్యపురం అనే ఊరిపై, దేవాలయంపై పరిశోధన చేస్తూ కనిపించారు.
‘ఈ ప్రాజెక్టులో నన్ను ఎక్కువ ఆకర్షించింది సుబ్రహ్మణ్యపురం’ అనే డైలాగ్‌తో ట్రైలర్‌ ఆరంభమైంది. ‘ఈ దేవాలయంలో ఏమైనా అద్భుతాలు జరిగాయా కార్తీక్‌?’ అంటూ సుమంత్‌ను సాయికుమార్‌ ప్రశ్నించారు‘గెలవడానికి ఆ భగవంతుడి సాయం కావాలని నేను నమ్ముతాను. కానీ నువ్వు ఆ భగవంతుడ్నే గెలుస్తాను అంటున్నావ్‌’ అని చెప్పే డైలాగ్‌ ఆకట్టుకుంది.
‘వీటి వెనుక దేవుడు ఉన్నా సరే.. నా కళ్లతో చూసే వరకు, నా చేతులతో పట్టుకునే వరకు, ఈ ఊరిని వదిలే ప్రసక్తే లేదు.. దేవుడి మహిమా? లేక మానవ మేథస్సా? చూద్దాం’ అని సుమంత్ సవాలు విసరటం సినిమాపై ఆసక్తిని పెంచింది.