పాన్ ఇండియా VFXలో మొనగాడెవరు?
భారీ బడ్జెట్లతో పాన్ ఇండియా సినిమాల్ని తెరకెక్కించడం ట్రెండ్ గా మారుతోంది. బాలీవుడ్ కి ధీటుగా టాలీవుడ్ లోనూ పాన్ ఇండియా సినిమాలు తెరకెక్కుతున్నాయి. అవి కేవలం దక్షిణాదిలోనే గాక ఉత్తరాదిన అత్యంత భారీగా రిలీజై ఇక్కడి కంటే అక్కడే పెద్ద హిట్టు కొడుతున్నాయి. అందుకు ఇటీవలే రిలీజైన `సాహో` పెద్ద ఎగ్జాంపుల్. ఈ సినిమా తెలుగులో కంటే హిందీలో పెద్ద హిట్టు కొట్టింది. అయితే సాహో చిత్రంలో కథ-కంటెంట్ లేదని విమర్శలు వచ్చినా ఎందుకని విజయం సాధించింది? అంటే అందుకు ఏకైక కారణం భారీతనం నిండిన యాక్షన్.. VFX పనితనం అని విశ్లేషించారు.
ఆ కోవలో పరిశీలిస్తే .. మన సినిమాల వీఎఫ్ ఎక్స్ రేంజ్ ఎలా ఉంది? అంటే.. హాలీవుడ్ సినిమాలకు ఏమాత్రం తీసిపోలేదనే తాజా పరిణామం చెబుతోంది. దర్శకధీరుడు ఎస్.ఎస్.రాజమౌళి తెరకెక్కించిన బాహుబలి 1.. బాహుబలి 2 చిత్రాలకు భారీగా వీఎఫ్ ఎక్స్ ఉపయోగించారు. బాహుబలి- ది బిగినింగ్ చిత్రానికి 1900 వీఎఫ్ ఎక్స్ షాట్స్ ఉపయోగించారు. బాహుబలి 2కి ఏకంగా 36 స్టూడియోల్లో 2226 వీఎఫ్ ఎక్స్ షాట్స్ ని రూపొందించామని అప్పట్లో వీఎఎక్స్ స్పెషలిస్ట్ కమల్ కన్నన్ తెలిపారు. దాదాపు 1000 మంది సాంకేతిక నిపుణులు రేయింబవళ్లు పని చేశారని వెల్లడించారు.
రజనీ-అక్షయ్- శంకర్ కాంబినేషన్ లో వచ్చిన 2.0 చిత్రానికి మొత్తం 25 వీఎఫ్ ఎక్స్ స్టూడియోల్లో దాదాపు 1000 మంది వీఎఫ్ ఎక్స్ నిపుణులు పని చేశారు. ఏకంగా 2150 VFX షాట్స్ ని తెరకెక్కించారు. వీటన్నిటితో పోలిస్తే మెగాస్టార్ చిరంజీవి కథానాయకుడిగా నటించిన `సైరా-నరసింహారెడ్డి` చిత్రానికి వీఎఫ్ ఎక్స్ వర్క్ ఎక్కువేనని తెలుస్తోంది. సైరాకు 17 స్టూడియోల్లో 3400 వీఎఫ్ ఎక్స్ షాట్లు తెరకెక్కించారు. దాదాపు 45 కోట్ల బడ్జెట్ ని ఖర్చు చేశారు. అలాగే అక్టోబర్ 2న `సైరా`తో పాటు రిలీజవుతున్న బాలీవుడ్ చిత్రం `వార్`కు 1000 వీఎఫ్ ఎక్స్ షాట్స్ తెరకెక్కించారని తెలుస్తోంది. హృతిక్- టైగర్ ష్రాఫ్ ఈ చిత్రంలో నటించారు.
మరోవైపు హాలీవుడ్ లో సంచలన విజయాలు సాధించిన అవతార్.. అవెంజర్స్ సిరీస్ చిత్రాలకు వీఎఫ్ ఎక్స్ ని భారీ స్థాయిలో ఉపయోగించారు. దాదాపు 1100 కోట్ల బడ్జెట్ తో తెరకెక్కించిన అవతార్ చిత్రానికి కేవలం వీఎఫ్ ఎక్స్ కోసమే 840 కోట్ల బడ్జెట్ ని కేటాయించారు. వందలాది VFX షాట్స్ ని తెరకెక్కించారు.
అయితే ఇటీవలే రిలీజైన సంచలన చిత్రం `అవెంజర్స్ ఎండ్ గేమ్ `చిత్రానికి 2496 వీఎఫ్ ఎక్స్ షాట్స్ ని ఉపయోగించారు. దాదాపు 3000 మంది నిపుణుల పని చేశారట. 14 వీఎఫ్ ఎక్స్ స్టూడియోలు పని చేశాయి.అవెంజర్స్ ఇన్ ఫినిటీ వార్ చిత్రానికి 2680 VFX షాట్స్ చిత్రీకరించారు. ఇంతకంటే మించి సైరాలో వీఎఫ్ ఎక్స్ షాట్స్? ఉపయోగించారా.. అన్నది చూస్తే కౌంట్ పరంగా నంబర్ ఎక్కువే కనిపిస్తోంది. మరి క్వాలిటీ పరంగా ఏ రేంజ్ ఉంటుందన్నది థియేటర్లలో చూసి చెప్పాల్సిందే. సైరా – నరసింహారెడ్డి చిత్రానికి 270 కోట్ల ఖర్చు ఎందుకయ్యింది? అంటే.. మెజారిటీ పార్ట్ వీఎఫ్ ఎక్స్ కి ఖర్చు చేసి ఉండాలని తెరపై చూసి విశ్లేషించాల్సి ఉంటుంది.